Dünən Milli Məclisin Sosial siyasət komitəsinin yaz sessiyasında ilk iclası keçirilib. İclasda ötən sessiyalar ərzində komitənin hazırladığı qanun layihələri və yeni qanunvericilik sənədləri ilə bağlı müzakirələr aparılıb.

Komitə sədri Hadı Rəcəbli bildirib ki, 2011-2013-cü ilərdə komitə tərəfindən  49 sənəd hazırlanaraq Milli Məclisin plenar iclasına təqdim olunub. H.Rəcəbli deyib ki, bəzən komitədə hər sessiya ərzində 4 qanun layihəsi müzakirəyə çıxarılıb.

Sonra iclasın gündəliyində olan "Azərbaycan Respublikası hökuməti və Türkiyə Respublikası hökuməti arasında işçi qüvvəsinin qarşılıqlı əmək fəaliyyətinə dair" sazişin təsdiq edilməsi barədə qanun layihəsi haqqında məlumat verilib. Bildirilib ki, saziş iki dövlət arasındakı işçi mübadiləsini tənzimləmək, mövcud dostluq və qardaşlıq münasibətlərini gücləndirmək, əməkdaşlığı və tərəfdaşlığı dəstəkləmək, iqtisadiyyatın inkişafına töhfə vermək məqsədi daşıyır. Bu saziş hər hansı sahə məhdudiyyəti olmadan bir tərəfin dövlətinin ərazisində haqqı ödənilən əmək fəaliyyətinə cəlb ediləcək digər tərəfin dövlətinin vətəndaşlarını əhatə edir. Sənədə əsasən, tərəflər işçilərin üzləşdiyi və ya üzləşə biləcəyi problemlərin həll edilməsi üçün məlumat mübadiləsi aparır, səlahiyyətləri çərçivəsində zəruri köməkliyin göstərilməsi məqsədilə müvafiq tədbirlər həyata keçirirlər.

İclasda müzakirə edilən digər qanun layihəsi isə "Azərbaycan Respublikası hökuməti və Belarus Respublikası hökuməti arasında pensiya təminatı sahəsində əməkdaşlıq haqqında" sazişin təsdiq edilməsi barədədir. Sazişə əsasən, tərəflər öz dövlətləri ərazisində daimi (Azərbaycanda həmçinin müvəqqəti) yaşayan, o cümlədən digər tərəf dövlətinin ərazisindən gəlmiş (köçmüş) bütün vətəndaşlara pensiya təminatı sahəsində öz vətəndaşları ilə eyni hüquqları verir. Həmçinin pensiya təminatının həyata keçirilməsi ilə əlaqədar bütün xərcləri təminatı həyata keçirən tərəfin dövləti ödəyir.

Müzakirələr zamanı hər iki qanun layihəsinin vacibliyi vurğulanıb və Milli Məclisin plenar iclasına tövsiyə olunub.

Sonda Sosial siyasət komitəsinin 2014-cü il yaz sessiyasının qanunvericilik işləri planı da təsdiq edilib.

Elgün MƏNSİMOV,

"Azərbaycan"