İpəyin hazırlanması üçün istifadə edilən ipəkqurdunun ana vətəni Çindir. Rəvayətə görə, eramızdan əvvəl 2600-cü illərdə Çin imperatoru Hoanq-Ti sarayın bağçasında bir qurdun tut yarpağı yediyini və barama hördüyünü müşahidə edir.

Bu, imperatorun diqqətini çəkir və həmin qurdun həyat tərzinin daha yaxından araşdırılmasını həyat yoldaşı Şe Linq Şeyə tapşırır. Uzunmüddətli araşdırmalardan sonra baramadan ipəyin alınacağı öz təsdiqini tapır.

Eramızdan əvvəl 2600-cü illərdə ipəkqurdu bəsləyən, ipək parçaları istehsal etməyin yollarını tapan çinlilər bu dəyərli parçaları dünyaya satmağa başlayıblar.

Çin bu kəşfinin sirrini min il gizli saxlayıb. Hətta baramanın sirrini satmağa cəhd edənlər edam da edilib. Amma əsrlər keçdikcə ərəblər və xaç yürüşlərindən geri dönən xristianlar baramanı tədricən Qərbi Avropaya gətiriblər.

İpək yolunun açılması da Çin imperasiyasının hökmdarı U-di-Nin adı ilə bağlıdır. Bu yolla Çindən əsasən ipək daşındığı üçün yol İpək yolu adlandırılıb.

Şərqdəki çox mühüm elmi və texnoloji innovasiyalar Qərbə məhz Çindən başlayan İpək yolu vasitəsilə aparılıb.

Barıt, maqnit kompası, çap dəzgahı, musiqi alətləri, ipək, keramik və boyalı məmulatlar kimi yeniliklərin Qərbə ötürülməsi bu yol vasitəsilə tədricən baş verib.

Eramızdan əvvəl dördüncü əsrdə Makedoniyalı İsgəndər Mərkəzi Asiya istiqamətində Hind çayını keçəndə artıq Çin ipəyinin Aralıq dənizinə çıxışı var idi. Bu qeydlərə əsasən İpək yolunun tarixinin bizim eradan əvvələ təsadüf etdiyi məlum olur.