11 Noyabr 2012 12:11
342
PARLAMENT
A- A+

Milli Məclisin nümayəndə heyəti Meksikada səfərdə olmuşdur

 

Azərbaycan ilə Meksika arasında parlamentlərarası əlaqələrin genişləndirilməsi və müxtəlif istiqamətlərdə ikitərəfli münasibətlərin inkişaf etdirilməsi məqsədi ilə Azərbaycan Respublikasının Milli Məclisinin nümayəndə heyəti Meksikada səfərdə olmuşdur.

Azərbaycan-Meksika parlamentlərarası əlaqələr üzrə işçi qrupunun rəhbəri Ülvi Quliyevin, deputatlar Asəf Hacıyevin və Asim Mollazadənin daxil olduğu nümayəndə heyəti Meksika Senatının Xarici əlaqələr komitəsinin sədri Teofilio Torres Corzo, Deputatlar Palatasının sədr müavini Fransisko Arroyo Vieyra, Meksika xarici işlər nazirinin müavini xanım Maria Aranda, habelə ölkənin aparıcı siyasi partiyalarının rəhbərləri və Konqres üzvləri ilə görüşmüşlər.

Azərbaycanın Meksikadakı səfirliyindən AzərTAc-a bildirmişlər ki, görüşlərdə iki ölkə arasında siyasi, iqtisadi, mədəni, təhsil və digər sahələrdə əlaqələrin genişləndirilməsi perspektivləri nəzərdən keçirilmiş, qarşılıqlı maraq doğuran məsələlər ətrafında fikir mübadiləsi aparılmışdır. Milli Məclisin deputatları, həmçinin Ermənistanın Azərbaycana qarşı davam edən təcavüzü, münaqişənin nəticələri və bütövlükdə region dövlətləri üçün yaratdığı təhdid və təhlükə barədə məlumat vermiş, rəsmi Yerevanın qeyri-konstruktiv və təcavüzkar siyasəti nəticəsində indiyədək problemin həll edilmədiyini bildirmişlər.

Senatın Xarici əlaqələr komitəsində keçirilmiş görüşdə tərəflər parlament diplomatiyasının iki ölkə arasında inkişaf edən əlaqələrə mühüm töhfə verəcəyinə əmin olduqlarını ifadə etmişlər. Hər iki ölkənin parlament üzvləri Azərbaycan və Meksika arasında dostluq və əməkdaşlıq münasibətlərinin gələcəkdə daha da genişləndirilməsi istiqamətində birgə səylərin davam etdiriləcəyini bildirmişlər.

Deputatlar Palatasının sədr müavini Fransisko Arroyo Vieyra ilə görüşdə iki ölkə arasında parlamentlərarası əlaqələrin genişləndirilməsi, qarşılıqlı səfərlərin davam etdirilməsi, dostluq qrupları arasında daha sıx əməkdaşlıq əlaqələrinin vacibliyi vurğulanmışdır.

Deputatlar Palatası adından Azərbaycan Prezidenti İlham Əliyevə salamlarını çatdıran F.Arroyo Vieyra Azərbaycan və Meksika arasında yaxın dostluq əlaqələrinin yarandığını bildirmiş, ölkəmizdə davam edən demokratik proseslərə, habelə Azərbaycanın tarixinə, adət-ənənələrinə, milli dəyərlərinə və ümummilli lider Heydər Əliyevin xatirəsinə dərin hörmətlə yanaşıldığını söyləmişdir. Sədr müavini ölkələrimiz arasında əlaqələrin genişləndirilməsi üçün gələcəkdə də əlindən gələni əsirgəməyəcəyini qeyd etmişdir.

Meksika xarici işlər nazirinin müavini Maria Aranda ilə görüşdə iki ölkə arasında geniş spektrdə əlaqələrin inkişaf etdirilməsi üçün qarşılıqlı marağın mövcud olduğu nəzərə çatdırılmışdır.

Ermənistan-Azərbaycan, Dağlıq Qarabağ münaqişəsinin həlli istiqamətində davam edən danışıqlar prosesinə münasibətini bildirən  nazir müavini M.Aranda Azərbaycanın ərazi bütövlüyünün Meksika tərəfindən tanındığını bildirmiş və münaqişənin sülh yolu ilə, BMT Təhlükəsizlik Şurasının qətnamələri əsasında həll edilməsinin vacibliyini vurğulamışdır.

Görüşlərdə Azərbaycanın Meksikadakı səfiri İlqar Muxtarov da iştirak etmişdir.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video