Mayın 2-də Milli Məclisin İqtisadi siyasət komitəsinin iclası keçirilmişdir. Komitənin sədri, akademik Ziyad Səmədzadə gündəlikdə duran məsələlər haqqında məlumat verərək demişdir ki, Azərbaycan Prezidenti "Avtomobil yolları haqqında" və "İcbari sığorta haqqında" Azərbaycan Respublikasının qanunlarına dəyişiklik edilməsi ilə əlaqədar Milli Məclisə iki qanun layihəsi təqdim etmişdir.

Qeyd olunmuşdur ki, Azərbaycan iqtisadiyyatının dinamik inkişafı yol-nəqliyyat kompleksi haqqında mövcud olan qanuna dəyişiklik edilməsi zərurətini yaratmışdır.

Qanun layihəsində yol işlərinin planlaşdırılması, yolların genişləndirilməsi, yol kənarındakı xidmət obyektlərinin fəaliyyətinin tənzimlənməsi, hərəkat iştirakçılarının hüquq və vəzifələri, yolun istismarı zamanı təhlükəsizliyin təmin olunması kimi məsələlər öz əksini tapmışdır.

Eyni zamanda layihədə Azərbaycanda ödənişli yolların salınması məsələsinə də aydınlıq gətirilmişdir. Mövcud respublika əhəmiyyətli yollara alternativ olaraq tikiləcək ödənişli yollar həm dövlət büdcəsinə gəlir gətirəcək, həm də sürücülərin rahatlığını təmin edəcəkdir.

Sonra "İcbari sığorta haqqında" qanun layihəsinə baxılmışdır.

Qeyd olunmuşdur ki, ölkədə iqtisadi fəallığın artması ilə əlaqədar sığorta müqavilələri də artmışdır. Cari ilin birinci rübündə sığorta bazarında 25 faiz artım müşahidə edilmişdir. Bu artım mövcud qanunvericiliyə dəyişiklik edilməsi məsələsini ortaya qoymuşdur.

Qanun layihəsində sığorta üçün lazım olan sənədlərin notariusda təsdiq olunması məsələsi aradan qaldırılmış, sənədləşmə işlərinin internet vasitəsi ilə aparılması nəzərdə tutulmuşdur.

Müzakirələrdə komitə üzvləri Vahid Əhmədov, Əli Məsimli, Cavid Qurbanov və başqaları iştirak etmişlər.

Hər iki qanun layihəsinin Milli Məclisin plenar iclasına çıxarılması tövsiyə olunmuşdur.