İyunun 10-da Milli Məclis Sədrinin birinci müavini, Təhlükəsizlik və müdafiə komitəsinin sədri Ziyafət Əsgərovun Əfqanıstan İslam Respublikasının rabitə və informasiya texnologiyaları naziri Əmirzai Sanginin başçılıq etdiyi nümayəndə heyəti ilə  görüşü olub.

Qonağı salamlayan Ziyafət Əsgərov Azərbaycanla Əfqanıstan arasında sıx əlaqələrin mövcud olduğunu və son dövrlərdə bu əlaqələrin daha da intensivləşdiyini qeyd edib. Bildirib ki, bu cür görüşlər xalqlarımız arasında münasibətlərin inkişafı üçün bir stimuldur və əlaqələrimizin dinamikliyini daha da artırır. Birinci vitse-spiker onu da vurğulayıb ki, Əfqanıstan Azərbaycanın müstəqilliyini tanıyan ilk dövlətlərdəndir. Sonra hər iki ölkə parlamentlərində mövcud olan dostluq qruplarının uğurlu fəaliyyətindən söhbət açılıb, ölkələrimiz arasında ticarət dövriyyəsinin artırılmasının vacibliyi vurğulanıb. 

Daha sonra Ziyafət Əsgərov təhlükəsizlik və hərbi müdafiə sahəsində qarşılıqlı əlaqələrdən danışıb, Azərbaycan sülhməramlılarının 94 nəfərdən ibarət taqımının hazırda Əfqanıstanda xidmətdə olduğunu diqqətə çatdırıb.

Əfqanıstan İslam Respublikasının rabitə və informasiya texnologiyaları naziri Əmirzai Sangi səmimi görüş və ətraflı məlumat üçün minnətdarlığını ifadə edib. O, Azərbaycanın Əfqanıstana dost və qardaş ölkə olduğunu, milli-mənəvi dəyərlər, mədəniyyət baxımından xalqlarımız arasında bir çox oxşarlıqların mövcudluğunu bildirib. Qonaq son illərdə Azərbaycana bir neçə dəfə səfər etdiyini və hər dəfə burada daha sürətli inkişafla rastlaşdığını qeyd edib. Nazir Cənubi Qafqazın iqtisadi cəhətdən ən qüdrətli dövləti olan Azərbaycanın Əfqanıstana dəfələrlə qardaş yardımı göstərdiyini diqqətə çatdırıb və buna görə öz ölkəsinin rəhbərliyi adından Azərbaycan Prezidenti İlham Əliyevə dərin təşəkkürünü bildirib.

Görüşdə Azərbaycanın iştirakçısı olduğu qlobal layihələrdən, hər iki ölkənin müdafiə sisteminin gücləndirilməsindən söhbət açılıb. Ermənistan-Azərbaycan, Dağlıq Qarabağ münaqişəsi daxil olmaqla, qarşılıqlı maraq doğuran digər məsələlər də müzakirə olunub.

Elgün MƏNSİMOV,

"Azərbaycan"