Osmanlı tibbi elmi cəhətdən Sultan Mehmet Fatehin dövründə xüsusilə inkişaf etmiş, məşhur həkimlər də həmin dövrdə yaşamışdır. O zaman Osmanlı tibb tarixinə adını qızıl hərflərlə yazdıran həkimlərdən biri də Sabunçuoğlu Şərəfəddin olmuşdu.

Amasiyada doğulan Şərəfəddinin babası Sabunçuoğlu Hacı İlyas Çələbi və atası Əli Çələbi də həkim idi və illərlə baş həkim olaraq çalışmışdılar. Amasiya Darüşşəfasında 11 illik təhsildən sonra 17 yaşında həkimliyə başlayan Şərəfəddin həm xəstələrin müalicəsi ilə maraqlanır, həm də tibbi biliyini artırmaq üçün oxumağa, araşdırmağa davam edirdi.

Amasiyada o dövrdə tez-tez ilan zəhərlənməsi baş verirdi və bunun müalicəsi üçün dərmanı da Sabunçuoğlu hazırlamışdı. Deyilənlərə görə, o, zərdab üzərində çalışarkən onu əvvəlcə toyuq və xoruzlar üstündə sınaqdan keçirmişdir. Nəticəsi yaxşı olduqdan sonra isə öz üzərində sınaqdan keçirməyə qərar vermişdir. Bunun üçün çox zəhərli bir ilan gətizdirmiş və sol əlinin baş barmağını dişlətmişdir. Özünü zəhərlədikdən sonra isə zərdabı özünə vurmuşdur. Və nəticədə nə barmağı şişmiş, nə də zəhərlənmişdir.

Şərəfəddin həkim müalicə zamanı musiqi alətlərindən də istifadə edib, musiqinin psixoloji narahatlıqlar üzərindəki müalicəedici təsirini pasiyentlərinə ustalıqla tətbiq edib.

Həmin dövrdə Sabunçuoğlunu digər həkimlərdən fərqləndirən əsas xüsusiyyəti isə cərrahlıqla maraqlanması idi. O dövrdə həkimlər cərrahlığa o qədər də maraq göstərmirdilər. Səbəbi isə cərrahi müdaxilədə həyati təhlükənin çox yüksək olması idi. Əməliyyatları asanlaşdıracaq tibbi alətlər, texniki vasitələr də çox az idi. Sabunçuoğlu isə cərrahi vasitələrin çoxunu əvvəlcə heyvanlar üzərində təcrübədən keçirir və uğurlu nəticəni görəndən sonra insanlara tətbiq edirdi. O, cərrahi əməliyyatlarının bəzilərində öz düzəltdiyi yüzdən çox tibbi alətdən istifadə edirdi. Və həmin alətləri və əməliyyat anlarını gələcək nəsillərə ötürmək üçün kitablarında rəngli illüstrasiyalar çəkdirirdi.

Sabunçuoğlunun tərcümə etdiyi və yazdığı cərrahi müdaxilələrdən, qadın xəstəliklərindən tutmuş intoksikasiya müalicəsi üsullarına, qırıq və çıxıq müalicələrinə qədər bir çox mövzuda illüstrasiyalı hekayələrlə zənginləşdirilmiş və misilsiz bir qaynağa çevrilmiş 3 kitabı var: “Cerrahiyyetü'l Haniyye”, “Akrabadin Tərcüməsi”, “Müccerrebnamə”.

Sabuncuoğlunun 85 yaşındaykən hazırladığı “Mücerrebnamə” əsəri isə türk təbabəti tarixində bir həkim tərəfindən yazılmış, eyni zamanda həkimin ixtira etdiyi dərmanların təsvir edildiyi və müalicə üsullarından bəhs olunan ilk monoqrafiyadır .

Amasiyada Sabunçuoğlu Şərəfəddinin həkim işlədiyi “Bimarhane”, indi “Sabunçuoğlu Tibb və Cərrahiyyə Tarixi muzeyi” kimi fəaliyyət göstərir və burada qədim tibbə aid çox dəyərli eksponatlar sərgilənir.