ARDNŞ-nin "Azərikimya" İstehsalat Birliyi respublikanın müxtəlif təhsil ocaqları ilə əlaqə saxlayır, gənc kadrların kimya müəssisələrində təcrübə keçməsi üçün lazım olan bütün şəraiti yaradır.

Qafqaz Universitetinin texniki və iqtisadiyyat fakültələri tələbələrinin "Universitet - müəssisə" sistemi üzrə təhsil illərindən başlayaraq istehsalata alışmaları, nəzəri biliklərini praktikada daha da zənginləşdirmələri üçün "açıq qapı" yaradılması istiqamətində işlər aparılır. Birliyin rəhbərliyi Qafqaz Universiteti ilə qarşılıqlı əlaqələri daha da gücləndirmək, tələbələrin "Azərikimya"da öz intellektual potensiallarını tətbiq etməklə kimyaçılar kollektivinə qaynayıb-qarışması məqsədilə bu günlərdə daha bir maraqlı ideya irəli sürmüşdür. "Azərikimya"nın saytının həm məzmun, həm də forma baxımından təkmilləşdirilərək daha müasir olmasında gələcək kimyaçıların texniki yaradıcılıq potensialından istifadə etmək qərara alınmışdır.

Birliyin nümayəndələri Qafqaz Universitetində olmuş və burada   təhsil alan tələbələrlə görüş keçirmişlər. Kimyaçıların ideyasının önündə gələcək mütəxəssislərin intellektual inkişafı, "Azərikimya" ilə yeni, daha sıx münasibətlərin formalaşması durduğu üçün universitet təmsilçiləri təşəbbüsü qəbul edərək, bu işə tələbələrin məmnunluqla qoşulacaqlarını bildirmişlər.

Görüşün davamı olaraq "Azərikimya"nın nümayəndələri auditoriylara dəvət olunmuş, onlara tələbələrin innovasiya texnologiyaları üzrə son dövrlərdəki texniki yaradıcılığı, o cümlədən müəllimlərlə birgə yaratdıqları, müstəsna praktiki əhəmiyyətə malik roboto-texniki vasitələr barədə ətraflı məlumat verilmişdir.

Yaxın günlərdə "Azərikimya"nın informasiya texnologiyaları şöbəsinin əməkdaşları  və tələbələr birliyn saytının təkmilləşdirilməsi üzrə birgə işə başlayacaqlar. 

Akif ƏLİYEV,

"Azərbaycan"