Maltanın "Eurovision-2012" təmsilçisi Kurt Calleja fevralın 12-də Bakıya gələcək və həmin gün Heydər Əliyev Sarayında keçiriləcək  Azərbaycanın "Eurovision-2012" təmsilçisinin seçimləri üzrə final yarışmasında  "This Is The Night" mahnısını ifa edəcəkdir. Bu, Kurt Callejanın may ayında keçiriləcək "Eurovision" mahnı müsabiqəsi ərəfəsində Bakıda ilk çıxışı olacaqdır.

 AzərTAc eurovision.az saytına istinadla xəbər verir ki,  bu barədə fevralın 4-də keçirilən final mərhələsində qələbəsindən sonrakı keçirdiyi mətbuat konfransında Kurt Callejanın özü  məlumat vermişdir.

Fevralın 4-də keçirilmiş milli final gecəsində, həmçinin Maltanın "Eurovision-2011" təmsilçisi Qlen Vella, Fransanın builki yarışmada təmsilçisi Anqun çıxış etmişlər.

Malta təmsilçisinin müəyyənləşdirilməsi məqsədilə keçirilmiş final gecəsinin maraqlı və tamaşaçılar tərəfindən möhtəşəmliklə qarşılanan məqamı isə Azərbaycanla bağlı olmuşdur. Yerli musiqisevərlər "Eurovision-2011"in qalibləri Eldar Qasımov və Nigar Camalın çıxışlarını böyük sevgi ilə qarşılamışlar. Ötən ilin mayında "Running Scared" mahnısı ilə bütün Avropanı fəth edən  Eldar və Nigar Maltadakı finalda duet ifası ilə yanaşı, yeni solo mahnılarını da təqdim etmişlər. "Eurovision-2011" qaliblərimiz həm də Malta təmsilçisinin seçimlərində münsiflər heyətinin tərkibində təmsil olunmuşlar.

Final gecəsinə qonaq kimi dəvət olunan Azərbaycanın İctimai Televiziya və Radio Yayımları Şirkətinin aparıcısı Hüsniyə Məhərrəmova maltalı iştirakçıları ürək sözləri ilə dəstəkləmişdir.