Türkiyədə də qeydə alınan “mu” ştammı yeni növ koronavirus (COVID-19) infeksiyasının yeni mutasiyasıdır. Bu ştamm daha çox yoluxuculuq xüsusiyyətinə malikdir.

Ümumiyyətlə, COVID-19 virusu tarix boyu yayılmış digər viruslardan çox fərqlidir. Məsələn, İspan qripinin 100 ildə cəmi 4 mutasiyası məlumdur. Yəni xəstəliyi idarə etmək mümkündür. COVID-19 isə iki ilə yaxındır yayılmasına baxmayaraq, dəfələrlə mutasiya edib. Ona görə də, panikaya düşmədən, hər şeyə hazır olmaq lazımdır. Qabaqlayıcı tədbirlər görmək, tibbi maska taxmaq, sosial məsafəni qorumaq hər zaman vacibdir. Sürətli yoluxduruculuq qabiliyyətinə malik olan “mu” ştammı qonşu Türkiyədə aşkarlanıbsa, Azərbaycanda da həmin ştamla yoluxmaq qaçılmazdır.

Tibb elmləri doktoru, professor Əlizamin Sadiqov AZƏRTAC-a koronavirusun “mu” ştammı ilə bağlı məlumat verib.

Professor bildirib ki, “mu” ştammının simptomlarında xüsusi fərq yoxdur: “Ümumiyyətlə, koronavirusun mövcud olan bütün ştamları arasında kəskin simptom fərqi müşahidə edilmir. Ola bilər ki, hansısa kliniki əlamət bir ştamda daha kəskin, digərində daha zəif olsun. Bu, mümkündür. Misal üçün, “Delta” ştamı yeni yayılmağa başlayanda mütəxəssislər qeyd edirdilər ki, həmin ştammla yoluxma zamanı virus əsasən üst tənəffüs yollarına təsir göstərir. Təcrübə əsasında isə aydın oldu ki, “Delta” ştammı digərlərindən daha ağır gedişə malikdir və daha öldürücüdür”.

Ə.Sadiqovun dediyinə görə, istənilən halda koronavirus əleyhinə vaksinasiya əhəmiyyətini saxlayır: “Peyvənd virusa yoluxmanın qarşısını ala bilməsə də, kliniki gedişatı nəzarətdə saxlamağa imkan verir. Hazırda COVID-19-dan qorunmağın əsas yolu vaksin vurdurmaqdır. Bununla yanaşı isə, əlbəttə ki, tibbi maskadan istifadəni, kütləvi toplaşmalardan yayınmağı unutmaq olmaz. Onu da qeyd edim ki, cəmiyyətdə koronavirusa münasibət köklü surətdə dəyişib. Demək olar ki, hər kəsin ailəsində, ətrafında kimsə koronavirusa yoluxaraq vəziyyəti ağırlaşıb və ya dünyasını dəyişib. Bu, vətəndaşların daha məsuliyyətli olmasına səbəb olur. Vətəndaşları qızıl qaydalara əməl etməyə və peyvənd vurdurmağa çağırıram. Çünki vaksinasiya, doğrudan da, ölüm riskini kəskin şəkildə azaldır və xəstəliyin kliniki gedişini yüngülləşdirir”.

Qeyd edək ki, sentyabrın 7-də Türkiyədə 2 nəfərin “mu” ştammı ilə yoluxması faktı qeydə alınıb.