Bolqar professor, genetik Uilyam Memerski əmin edir ki, insan xəstəliklərinin yaranmasının 66 faizi seçdiyi qidalardan asılıdır. Professor qətiyyətlə bildirir ki, qocalıq təbii proses deyil, xəstəlikdir və biz özümüz qeyri-sağlam qida vərdişlərimizlə onu sürətləndiririk: “Dünyada insanların 70 faizi məhz düzgün qidalanmadığı üçün ölür. Bəşəriyyətin bəlası olan podaqra, insult, infarkt, diabet, xərçəngin müxtəlif növləri kimi xəstəliklərin yaranma səbəbi yediyimiz zərərli məhsullardan yaranır”.

U.Mermerski bildirir ki, sadə qidalanma qaydalarına əməl etməklə dəri və orqanları gənc saxlamaq mümkündür: “Başlıcası ifrata varmaq olmaz. Tərəvəz, meyvə, qatıq, süd, şərab yaşlanmanı gecikdirir. Lakin şərab təbii olmalı və az istifadə edilməlidir. Məsələn, Fransada əti qırmızı şərabla yumşaltmaq ənənəsi var. Bunun sayəsində fransızlar daha sağlam və gümrah olurlar. Quru südlə mayalanmış qatığın heç bir müalicəvi effekti yoxdur. Təbii qatıq daha yaxşı həzm olunan qidadır. O, mədə və yoğun bağırsaq xərçəngi xəstəliyinin qarşısını alır, osteoporozun inkişafını dayandırır”.

Məşhur professor özünün uzunömürlülük reseptini də təqdim edir:

- çox kalorili məhsullar yeməyin;

- hər gün bir alma yeyin;

- su və bitki çayları için;

- aktiv və hərəkətli olun;

- hər gün duş qəbul edin;

- sərin otaqda yatın;

- istirahət günlərində piyada gəzin və velosiped sürün;

- özünüzü sizi sevən dostlarla əhatə edin, çoxlu gülün;

- heç vaxt düşünməyin və deməyin ki, siz yaşlanırsınız.