29 Iyun 2012 03:06
414
PARLAMENT
A- A+

Estoniyanın Dağlıq Qarabağ münaqişəsinin həlli ilə bağlı mövqeyi dəyişməmişdir

 

Azərbaycanda səfərdə olan Estoniya Respublikası parlamentinin sədri xanım Ene Erqma iyunun 28-də Milli Məclisə gəlmişdir. Parlamentin binası önündə qonağı Milli Məclisin Sədri Oqtay Əsədov və digər rəsmi şəxslər qarşılamışlar.

Estoniya parlamentinin sədri Milli Məclisdəki Heydər Əliyev Xatirə zalına baxmışdır. Burada ümummilli lider Heydər Əliyevin fəaliyyətinin müxtəlif dövrlərini, xarici ölkələrə səfərlərini, eləcə də Bakıya gəlmiş qonaqlarla keçirdiyi görüşləri əks etdirən fotoşəkillər, tarixi materiallar qonaqda böyük maraq doğurmuş, dərin təəssürat yaratmışdır.

Sonra Oqtay Əsədov ilə Ene Erqma arasında təkbətək görüş olmuşdur.

Daha sonra görüş geniş tərkibdə davam etdirilmişdir.

Oqtay Əsədov demişdir ki, Azərbaycan ilə Estoniya arasındakı əlaqələrin qədim tarixi vardır. Hər iki dövlət müstəqilliyini bərpa etdikdən sonra münasibətlərimiz yeni müstəvidə inkişaf etməyə başlamışdır.

Ölkələrimiz arasındakı əlaqələrin  inkişafında dövlətlərimizin başçılarının rolunu xüsusi qeyd edən O.Əsədov demişdir ki, dövlət başçılarının səfərləri, apardıqları danışıqlar, imzalanmış çoxsaylı sənədlər əməkdaşlığımızın daha da genişləndirilməsi üçün möhkəm hüquqi baza və zəmin yaratmışdır.

Dövlətlərarası əlaqələrin inkişafında parlamentlərin də rolu böyükdür. Hər iki ölkənin parlamentlərində dostluq qruplarının fəaliyyət göstərməsi, deputatlarımızın Avropa Şurası, ATƏT, GUAM, Baltik Assambleyası və digər nüfuzlu beynəlxalq təşkilatlarda faydalı əməkdaşlığı bizi daha da yaxınlaşdırır.

Milli Məclisin Sədri Azərbaycan ilə Estoniya arasında iqtisadi əlaqələrin də inkişafı üçün geniş imkanlar olduğunu bildirmişdir.

Sonra Oqtay Əsədov Dağlıq Qarabağ münaqişəsi barədə qonağa ətraflı məlumat vermiş, bu məsələ ilə bağlı Azərbaycan və Estoniya prezidentlərinin 2009-2010-cu illərdə imzaladıqları birgə bəyannamələrin əhəmiyyətindən söhbət açmışdır. Bildirmişdir ki, həmin  sənədlərdə Dağlıq Qarabağ münaqişəsinin beynəlxalq hüququn ümumtanınmış prinsipləri və normaları, xüsusilə BMT-nin Təhlükəsizlik Şurasının müvafiq qətnamələrinə və ATƏT-in Lissabon Sammitinin suverenlik, ərazi bütövlüyü və sərhədlərin toxunulmazlığı prinsipləri əsasında tezliklə həll olunmasının vacibliyi vurğulanmışdır. Tərəflər, eyni zamanda, münaqişənin sülh yolu ilə həll edilməsi istiqamətində ATƏT çərçivəsində davam edən səylərə, həmçinin Minsk qrupunun fəaliyyətinə istinad edərək bu istiqamətdə daha təsirli və qətiyyətli addımlar atılmasının vacibliyini qeyd etmişlər.

Milli Məclisin Sədri Estoniyanın Dağlıq Qarabağ münaqişəsi ilə bağlı mövqeyinin dəyişməyəcəyinə və problemin həlli ilə bağlı səylərini bundan sonra da artıracağına ümidvar olduğunu bildirmişdir.

Ene Erqma Bakıya ilk dəfə səfər etdiyini və bu səfərindən məmnun qaldığını bildirmişdir. O demişdir: "Mən dəfələrlə Azərbaycanda  olmaq istəmişəm, amma gələ bilməmişəm. Bakı həqiqətən də gözəl şəhərdir və məni valeh etmişdir".

Dövlətlərarası əlaqələrin inkişafında parlamentlərin rolunu xüsusi qeyd edən Ene Erqma demişdir ki, deputatlarımızın beynəlxalq təşkilatlarda, tədbirlərdə birgə fəaliyyəti əməkdaşlığımızı digər sahələrdə də genişləndirməyə imkan yaradır.

Estoniyanın Cənubi Qafqazda gedən prosesləri diqqətlə izlədiyini vurğulayan E.Erqma bildirmişdir ki, rəsmi Tallinn Azərbaycanı özünün yaxın dostu hesab edir. Bizim Dağlıq Qarabağ münaqişəsi ilə bağlı mövqeyimiz də dəyişməmişdir. Biz bu münaqişənin tezliklə, ədalətli həllinə tərəfdarıq.

Görüşdə, həmçinin Azərbaycan ilə Estoniya arasında iqtisadi, humanitar, mədəni sahələrdə əlaqələrin inkişaf perspektivləri, qarşılıqlı səfərlərin əhəmiyyəti və s. məsələlər ətrafında geniş fikir mübadiləsi aparılmışdır. 

 

AzərTAc

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video