Xəbər verildiyi kimi, Əfqanıstan prezidenti Əşrəf Qani ölkəni tərk edərək istefa verdiyini bildirmişdir. Bu barədə Milli Barışıq üzrə Ali Şuranın rəhbəri Abdulla Abdulla məlumat vermişdir. 
“Əl-Ərəbiyyə” telekanalının xəbərinə görə, ölkədə keçid hökumətinin başçısı səlahiyyətlərini Əfqanıstanın sabiq daxili işlər naziri Əhməd Cəlali icra edəcək. Keçid hökuməti hakimiyyəti dinc yolla “Taliban”a ötürəcək. Belə ki, taliblər hakimiyyəti prezident Əşrəf Qanidən almağa razılıq verməmişlər. Qaninin Tacikistana, Özbəkistana və Qazaxıstana uçduğu barədə xəbərlər yayılsa da, bunların heç biri təsdiqini tapmamışdır. 
Hələlik keçid dövrü zamanı qarşıdurmaların baş verməməsi üçün ölkədə komendant saatı elan edilmişdir. “Taliban” rəhbərliyi hərəkat üzvlərinə ölkə sakinlərini qorxutmamağa və sərt tədbirlər görməməyə çağırmışdır. Bildirilmişdir ki, təqsiri olan vətəndaşların cəzalandırılması, məsələn, əl-ayağının kəsilməsi, daşqalaq edilməsi ancaq məhkəmənin hökmü ilə həyata keçiriləcək.
Qeyd edək ki, srağagün səhər paytaxta daxil olan “Taliban” dəstələri ölkə rəhbərliyinə hakimiyyəti dinc yolla ötürməyi təklif etmişlər. Onlar həmçinin bütün hərbçilərə və məmurlara amnistiya vəd vermişlər. Əfqanıstandakı ən iri Puli-Çarxi həbsxanasından bütün məhbuslar azadlığa buraxılmışdır. 2018-ci ilin məlumatına görə, orada 5 minədək məhbus saxlanılırdı. 
Bu arada ABŞ-ın dövlət katibi Entoni Blinken bildirmişdir ki, əfqan qüvvələri ölkəni müdafiə edə bilmədilər. Dövlət katibi həmçinin vurğulamışdır ki, ABŞ Əfqanıstanda terror təhlükəsini aradan qaldırmalı idi və öz məqsədinə nail oldu.
Moskva isə Əfqanıstandakı keçid hökuməti ilə əməkdaşlıq etməyə hazır olduğunu bildirmişdir Bu barədə Rusiya Federasiyasının (RF) Kabildəki səfirliyindən məlumat verilmişdir. Deyilənə görə, keçid hökuməti rəsmi hakimiyyət orqanları və “Taliban”ın (bu təşkilat RF-də terrorçu kimi tanınır və fəaliyyəti qadağan edilmişdir) nümayəndələrinin iştirakı ilə formalaşdırılacaq və haklimiyyəti dinc yolla hərəkata ötürəcək. Eyni zamanda Rusiya XİN-də bildirmişlər ki, “Moskva hələ ki talibləri Əfqanıstanın qanuni hökuməti qismində tanımır”.