Hörmətli redaksiya! 9-cu mikrorayon paytaxtımızda sakinlərin sıx məskunlaşdığı, enişli-yoxuşlu ərazidə yerləşən yaşayış sahələrindəndir. Son illər burada abadlıq-quruculuq işləri aparılmış, sakinlərin rahatlığı üçün istirahət guşələri yaradılmışdır. Bu, bizi çox sevindirir.

Bunlara rəğmən, bizi narahat edən bir məsələni - ictimai nəqliyyatla bağlı təklifimizi aidiyyəti qurumların nəzərinə çatdırmaq istəyirik. Şəhərimizin müxtəlif istiqamətlərinə işləyən bir neçə marşrut xəttinin mikrorayonun aşağı hissəsində iki yerdə son dayanacağı var: 7, 18, 26, 29, 61, 65 nömrəli marşrutlar bu ərazidə fəaliyyət göstərir. Onların işindən narazılığımız yoxdur. Rahat, səliqə-sahmanlı, mədəni xidmət göstərən marşrutlardır. Bizi qayğılandıran isə odur ki, mikrorayonun yuxarı hissəsinə cəmi bir - 85 nömrəli marşrut işləyir. Dediyimiz kimi, yaşayış sahəsi enişli-yoxuşlu olduğuna görə aşağı hissəyə rahat gəlib çatan sakinlər (qocalar, qadın və uşaqlar) yoxuşlu ərazini qalxmaqda əziyyət çəkirlər. Aşağı hissəyə 6, yuxarı əraziyə 1 marşrut xəttinin işləməsi nə dərəcədə doğru və ədalətlidir? Yaxşı olardı ki, burada bütün sakinlərin maraqları, rahatlığı nəzərə alınsın: ya əlavə marşrut xətti (əvvəllər burada 27 nömrəli marşrut fəaliyyət göstərirdi) çəkilsin, ya da aşağıdakı xətlərdən bir neçəsinin səmti dəyişdirilib yuxarı əraziyə yönləndirilsin.

Xahiş edirik, aidiyyəti qurumlar bu məsələni hərtərəfli araşdırıb sakinlərin müraciətinə obyektiv reaksiya versinlər.

Niyazi HƏBİBOV,

Bakı şəhəri