bp Azərbaycan şirkəti ölkəmizin 2012-ci ildə Londonda keçiriləcək Olimpiya və Paralimpiya Oyunlarına hazırlaşan milli komandalarına və bir qrup seçilmiş idmançısına dəstək verəcək. Bu münasibətlə şirkət Azərbaycan Milli Olimpiya və Milli Paralimpiya komitələri ilə tərəfdaşlıq müqavilələri imzalayıb.

"Hilton" mehmanxanasında keçirilən imzalama mərasimində bp-nin Azərbaycan, Gürcüstan və Türkiyə üzrə regional prezidenti Rəşid Cavanşir çıxış edərək dedi: "Azərbaycan Milli Olimpiya və Milli Paralimpiya komitələrinə, həmçinin oyunlara gedəcək bir qrup idmançıya dəstək vermək imkanı əldə etdiyimizdən məmnunluq duyuruq. Bu, ölkə üçün həyəcan dolu bir dövr olacaq. bp hər kəsi əmin etmək istəyir ki, Azərbaycan idmançılarının oyunlarda yarışmağını izləyərkən onların keçirdikləri həyəcanı, həmçinin onlar vətənə Olimpiya medalları ilə qayıdarkən duyduqları fərəhi bölüşəcək".

O, həmçinin xatırlatdı ki, bp London oyunlarının əsas tərəfdaşlarından biridir: "Biz bu oyunların baş tutmasına kömək edirik. bp həm də həmin oyunlara xidmət göstərəcək təxminən 5 min nəqliyyat vasitəsini yanacaq və sürtkü yağları ilə təmin edəcək. Yəni bp bu oyunların "yanacaq mənbəyi"dir".

R.Cavanşir eləcə də bp-nin "London-2012 Oyunları" üçün öz xüsusi nümayəndələri kimi seçdiyi yeddi Azərbaycan idmançısının adlarını açıqladı. Şirkət üç Olimpiya və dörd Paralimpiya idmançısından ibarət bu qrupun həm "London-2012 Oyunları"na hazırlığını, həm də orada iştirakını dəstəkləyəcək. Həmin idmançılar bunlardır: Cəbrayıl Həsənov (sərbəst güləş), Fəridə Əzizova (taekvondo), Rövşən Bayramov (yunan-Roma güləşi - klassik güləş), İlham Zəkiyev və Afaq Sultanova (cüdo), Oloxan Musayev və Oleq Panyutin (atletika).

Tədbirdə gənclər və idman nazirinin müavini İsmayıl İsmayılov da çıxış etdi. O, ölkəmizdə idmanın inkişafına göstərilən dövlət qayğısından, Prezident İlham Əliyev tərəfindən 2012-ci ilin "İdman ili" elan olunmasından danışdı. bp-nin idmançılara dəstək verməsinin təqdirəlayiq hal olduğunu vurğuladı.

Azərbaycan Milli Olimpiya Komitəsinin vitse-prezidenti Çingiz Hüseynzadə dedi: "Bu strateji tərəfdaşlıq bp şirkətinin ölkəmiz və xalqımız qarşısında götürdüyü öhdəliyə sadiq olduğunu nümayiş etdirir. Azərbaycanda aparıcı operator kimi gördüyümüz bu şirkətin ölkəmizin Milli Olimpiya və Milli Paralimpiya komitələri ilə tərəfdaş olmaq qərarını verməsindən çox məmnunuq. Ümid edirik ki, bu tərəfdaşlıq da bp-nin əvvəllər Azərbaycanda həyata keçirdiyi digər təşəbbüsləri kimi uğurlu olacaq".

Milli Paralimpiya Komitəsinin prezidenti İlqar Rəhimov isə dedi ki, Zənnimizcə, bu tərəfdaşlıq idmanın cəmiyyətdə hər kəsə fayda verə biləcəyi barədə məlumatlılığını artırmağa kömək edir. Biz inanırıq ki, bp-nin xüsusilə bizim komitə ilə tərəfdaşlığı "London-2012 Paralimpiya Oyunları"nda iştirak etmək kimi çətin öhdəliyi qəbul etmiş idmançılarımıza qarşı hər birimizin hörmət və heyranlıq hisslərini bir daha vurğulayır.

Mərasimdə bp-nin dəstək göstərdiyi idmançıların nümayəndələri də çıxış edərək şirkətə öz minnətdarlıqlarını bildirdilər.

Xatırladaq ki, bu il bp-nin ölkəmizdə fəaliyyət göstərməsinin 20 illiyi qeyd olunacaq. İdmançılara dəstək barədə müqavilələrin imzalanmasının da bu xoş tarixə təsadüf etməsi yerinə düşür. Həmin müqavilələrə əsasən şirkət Azərbaycan Milli Olimpiya və Milli Paralimpiya komitələrinin "London-2012 Oyunları"nda rəsmi tərəfdaşı olacaq.