Avtomobilimi könüllü şəkildə sığortalatdırmışam. Lakin bu yaxınlarda yol qəzası nəticəsində maşınım əzilib. Bilmək istəyirəm, maşınıma dəyən zərərin müəyyənləşdirilməsi necə olacaq?

Y.Məmmədli,

Bakı şəhəri

- Sığorta hadisəsi nəticəsində dəymiş zərərin miqdarı Azərbaycan Respublikası Mülki Məcəlləsinin 925-ci maddəsində nəzərdə tutulmuş qaydada müəyyənləşdirilir. Həmin maddənin tələbinə görə, zərəri sığortalının, sığorta olunanın və ya faydalanan şəxsin, yaxud onların nümayəndəsinin təqdim etdiyi sığorta tələbi əsasında mümkün olan ən qısa müddət ərzində sığortaçı müəyyən edir. Sığortaçı dəymiş zərəri müxtəlif üsullarla, o cümlədən zərər dəymiş predmetin və ya hadisə yerinin fiziki və texniki xüsusiyyətlərini müxtəlif vasitələrlə təyin etməklə, sxem və cizgilər tərtib etməklə, foto və video çəkilişlər aparmaqla, bilavasitə özü və ya “Sığorta fəaliyyəti haqqında” Azərbaycan Respublikası Qanununun 10.10-cu maddəsinin tələbini nəzərə almaqla, nümayəndəsi kimi təyin etdiyi sığorta sahəsində yardımçı fəaliyyət göstərən müvafiq şəxs vasitəsilə qiymətləndirir. Zərərin sığortaçı tərəfindən qiymətləndirilməsi, habelə miqdarı barədə tərəflər arasında razılıq əldə edilmədikdə, zərərin miqdarının qiymətləndirilməsi “Sığorta fəaliyyəti haqqında” Azərbaycan Respublikası Qanununun 10.10-cu maddəsinə uyğun olaraq, təyin edilən müstəqil ekspert tərəfindən aparılır.

Göründüyü kimi, zərərin miqdarını müəyyələşdirmək hüququ sığortaçıya məxsusdur. Əgər siz sığortaçının qiymətləndirməsi ilə razı olmasanız, onda qiymətləndirmə müstəqil ekspert tərəfindən aparılacaq. Tərəflər arasında razılıq əldə edilməzsə, onda mübahisə məhkəmə qaydasında həll olunmalıdır. Məhkəmə təcrübəsi göstərir ki, bir qayda olaraq məhkəmələr bu cür işlərdə ekspertiza təyin etməklə dəymiş zərərin miqdarını müəyyənləşdirirlər.   

Cavablandırdı:

Dünyamin NOVRUZOV,

Bakı Hüquq Mərkəzinin hüquq məsləhətçisi