10 Oktyabr 2012 01:10
257
PARLAMENT
A- A+

Azərbaycanla Meksika arasında iqtisadi əlaqələrin inkişafı üçün geniş potensial var

 

Oktyabrın 9-da Milli Məclisin Sədri Oqtay Əsədov Azərbaycanda səfərdə olan Meksika Konqresinin Deputatlar Palatasının beynəlxalq əlaqələr komitəsinin sədri  Porfirio Munyoz Ledo ilə görüşüb.

Oqtay Əsədov deyib ki, bu gün Azərbaycan ilə Meksika arasında əlaqələr yüksələn xətlə inkişaf edir. Son bir ildə Meksikadan Azərbaycana bir neçə nümayəndə heyəti gəlib. Meksika dövləti və parlamenti ilə əlaqələrin inkişaf etdirilməsi Azərbaycanın xarici siyasətinin əsas prioritetlərindəndir və hər iki dövlət arasında olan münasibətlər strateji tərəfdaşlıq səviyyəsinə yüksəlib: "Biz, 20 Yanvar faciəsi, Xocalı soyqırımı və ümumiyyətlə, Azərbaycanın ərazi bütövlüyünün tanınması ilə bağlı Meksika parlamentinin qəbul etdiyi qərarları yüksək qiymətləndiririk və buna görə, meksikalı dostlarımıza minnətdarlıq edirik".  

Milli Məclisin Sədri bildirib ki, Azərbaycan və Meksika arasında siyasi əlaqələr çox yüksək səviyyədədir, amma iqtisadi, ticarət dövriyyəmiz günün reallıqlarını əks etdirmir. Buna görə də iqtisadi münasibətlərin genişləndirilməsi üçün ciddi iş görülməlidir və buna geniş imkanlar vardır.

O.Əsədov tezliklə Azərbaycanda Meksikanın səfirliyinin fəaliyyətə başlamasının hər iki tərəfin xeyrinə olacağını bildirib.

Porfirio Munyoz Ledo Azərbaycanda olmaqdan şərəf duyduğunu və məmnun qaldığını deyib: "Həqiqətən də, ölkələrimiz arasında əlaqələrin hərtərəfli inkişafında parlamentlərin böyük rolu var. Meksika parlamentinin hər iki palatası - Senat və Deputatlar Palatası Azərbaycan ilə əlaqələrin inkişafında maraqlıdır. Biz də hesab edirik ki, iqtisadi əlaqələrimizin inkişafı üçün geniş imkanlar var. Bakıda Meksikanın səfirliyinin açılması münasibətlərimizin daha da genişlənərək bütün sahələri əhatə etməsində mühüm rol oynaya bilər. Meksikaya qayıdan kimi bu məsələni yenidən qaldıracağam".

Porfirio Munyoz Ledo Meksikanın mərkəzi meydanlarından birinə ulu öndər Heydər Əliyevin adının verildiyini xatırladaraq bunu Azərbaycan xalqına və onun ümummilli liderinə olan hörmətin bariz nümunəsi kimi qiymətləndirib.

Görüşdə dövlətlərarası əlaqələrin inkişafında parlamentlərin rolu, Azərbaycan ilə Meksika arasında iqtisadi, humanitar, mədəni sahələrdə əməkdaşlığın inkişaf perspektivləri, qarşılıqlı səfərlərin əhəmiyyəti və digər məsələlər ətrafında geniş fikir mübadiləsi aparılıb. 

 

"Azərbaycan",

Foto F.BAĞIROVUNDUR

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video