14 Mart 2013 02:03
425
Qəbullar
A- A+

Azərbaycan Prezidenti İlham Əliyev Beynəlxalq konfransın iştirakçılarını qəbul etmişdir

 

Azərbaycan Respublikasının Prezidenti İlham Əliyev martın 13-də "Mülki müdafiə və əhalinin fəlakət riskinin qarşısının alınmasına hazırlanması" mövzusunda Qəbələdə keçirilmiş Beynəlxalq konfransın iştirakçılarını qəbul etmişdir.  

Ölkələrimizin müvafiq qurumları arasında əməkdaşlığın önəmini qeyd edən Prezident İlham Əliyev Azərbaycanda "Mülki müdafiə və əhalinin fəlakət riskinin qarşısının alınmasına hazırlanması" mövzusunda keçirilən konfransı bu əlaqələrin mühüm göstəricilərindən biri kimi qiymətləndirdi. Dövlət başçısı ölkələrimizdə fövqəladə hallarla məşğul olan müvafiq qurumların bir-birinə qarşılıqlı dəstək vermələrinin vacibliyini vurğuladı. Fövqəladə Hallar nazirliklərinin təhlükələrin, fəlakətlərin qarşısının alınması və onların nəticələrinin aradan qaldırılması baxımından çox mühüm vəzifəni yerinə yetirdiyini qeyd edən Prezident İlham Əliyev əhalini mümkün risklərin qarşısının alınmasına hazırlamağın hər bir cəmiyyət üçün mühüm amil olduğunu dedi.

Ölkəmizdə son bir neçə ildə baş vermiş təbii fəlakətlərə, daşqınlara və zəlzələlərə toxunan dövlət başçısı qeyd etdi ki, daşqınlar zamanı 10 minlərlə insan evsiz-eşiksiz qaldı, 100 min hektardan çox ərazi sel suları altında qaldı. Fövqəladə Hallar Nazirliyinin peşəkar  fəaliyyəti sayəsində həmin hadisələr zamanı sakinlər fəlakət zonasından köçürüldü, operativ şəkildə müvəqqəti yaşayış məntəqələri salındı və orada səhiyyə, iaşə və digər xidmətlər təşkil olundu. Ən başlıcası isə insan tələfatına yol verilmədi. Azərbaycanın şimal bölgələrində baş vermiş zəlzələ zamanı 3 mindən çox evin, çoxlu sayda məktəbin və digər obyektlərin dağıldığını deyən dövlət başçısı fəlakətdən dərhal sonra zəlzələ zonasında  genişmiqyaslı tikinti işlərinə başlandığını və dağılmış bütün evlərin, sosial obyektlərin dövlət vəsaiti hesabına tikildiyini, bu prosesin davam etdirildiyini vurğuladı.

Təbii fəlakətlər zamanı ölkələrin müvafiq qurumlarının əlaqəli şəkildə işləmələrinin vacibliyini vurğulayan Prezident İlham Əliyev bu cür hadisələr zamanı Fövqəladə Hallar nazirliklərinin birgə fəaliyyət göstərmələrinin önəmini xüsusi qeyd etdi.

Ölkəmizdə Fövqəladə Hallar Nazirliyi yaradılarkən qarşıya qoyulan məqsədin  həm Azərbaycanda baş verən fəlakətlərin aradan qaldırılması,  həm də qonşu və dost ölkələrə yardım  göstərilməsindən  ibarət olduğunu vurğulayan dövlət başçısı son illər bir sıra ölkələrdə baş vermiş fövqəladə hadisələr zamanı xilasetmə, bərpa və yardım işlərində Azərbaycanın Fövqəladə Hallar Nazirliyinin yaxından iştirak etdiyini diqqətə çatdırdı.  Prezident İlham Əliyev bu  konfransın Azərbaycanda  keçirilməsinin tədbir iştirakçılarının ölkəmizlə daha yaxından tanış olması  baxımından əhəmiyyətini də qeyd etdi.  

Azərbaycan hökumətinin dəvəti ilə ölkəmizə səfər etmələrindən məmnunluğunu ifadə edən Beynəlxalq Mülki Müdafiə Təşkilatının baş katibi Navaf əl-Sleybi yüksək qonaqpərvərliyə görə Prezident İlham Əliyevə minnətdarlığını bildirdi. O, ölkəmizdə gedən sürətli inkişaf proseslərinin şahidi olduqlarını dedi. Prezident İlham Əliyevin  dəstəyi ilə Fövqəladə Hallar Nazirliyinin ən yaxşı modellərindən birinin Azərbaycanda yaradıldığını vurğulayan  Navaf əl-Sleybi bu təcrübədən istifadə etməyin önəmini diqqətə çatdırdı. Azərbaycanın  Beynəlxalq Mülki Müdafiə Təşkilatı ilə fəal əməkdaşlıq etdiyini deyən qonaq Qəbələdə yüksək səviyyədə təşkil olunmuş  konfransı  əməkdaşlığın perspektivlərini müzakirə etmək baxımından  yaxşı fürsət yaratdığını dedi.

Sonda  Navaf əl-Sleybi  dövlət başçısına Beynəlxalq Mülki Müdafiə Təşkilatının xatirə hədiyyəsini  təqdim etdi.

 

AzərTAc

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video