Azərbaycanda səfərdə olan BMT-nin Ərzaq və Kənd Təsərrüfatı Təşkilatı (FAO) baş direktorunun müavini, qurumun Avropa və Mərkəzi Asiya üzrə regional nümayəndəsi xanım Fernanda Guerrieri sentyabrın 20-də kənd təsərrüfatı naziri İsmət Abasov ilə görüşmüşdür.

AzərTAc xəbər verir ki, görüşdə Azərbaycan ilə BMT-nin Ərzaq və Kənd Təsərrüfatı Təşkilatının əlaqələrinin uğurla inkişaf etdiyi vurğulanmış, əməkdaşlığın perspektivləri, FAO-nun gələn ilin aprelində Bakıda keçiriləcək Avropa üzrə 28-ci regional konfransı və kənd təsərrüfatı üzrə Avropa Komissiyasının 37-ci sessiyası ilə bağlı müzakirələr aparılmışdır. Əlaqələrin bundan sonra da uğurla  davam edəcəyinə əminlik ifadə olunmuşdur.

İsmət Abasov bildirmişdir ki, Azərbaycan 16 ildir ki, FAO-nun üzvüdür. Əlaqələrimiz ölkədə aqrar sahənin inkişafına öz töhfəsini verməkdədir. Azərbaycan hökuməti bu əlaqələri daha da genişləndirmək üçün mühüm addımlar atır. FAO-nun gələn il Bakıda keçiriləcək iki tədbiri münasibətlərimizin uğurla inkişafına bariz nümunədir.

Fernanda Guerrieri vurğulamışdır ki, Azərbaycan təbii ehtiyatlarla zəngin ölkədir. Əhalinin 38 faizi kənd təsərrüfatında çalışır. Azərbaycan dövləti daim aqrar sahənin inkişafına diqqət göstərir. FAO bundan sonra da Azərbaycan ilə əməkdaşlığı davam etdirəcəkdir.

Daha sonra gələn ilin aprelində BMT-nin Ərzaq və Kənd Təsərrüfatı Təşkilatının Bakıda keçiriləcək iki tədbiri ilə əlaqədar Azərbaycan hökuməti və FAO-nun üzərlərinə götürdükləri öhdəliklərlə bağlı sənəd imzalanmışdır. Sənədi İsmət Abasov və Fernanda Guerrieri imzalamışlar.

Sonda jurnalistləri maraqlandıran suallar cavablandırılmışdır.