Dövlət başçısının "Enerji və su sektorlarında maliyyə intizamının gücləndirilməsi tədbirləri haqqında" 25 mart 2002-ci il tarixli Sərəncamı ilə təsdiq edilmiş "Enerji sektorunda maliyyə intizamının gücləndirilməsi Proqramı"na əsasən, ARDNŞ-in maliyyə göstəricilərinin yaxşılaşdırılması istiqamətində istehsal məsrəflərinin azaldılması məqsədilə xidmət və digər köməkçi müəssisələrin, sosial-məişət təyinatlı obyektlərin özəlləşdirilməsi və ya digər təşkilatların balansına verilməsi nəzərdə tutulmuşdur.

Həmin sərəncama uyğun olaraq, indiyədək enerji sektorundakı bəzi obyektlər, o cümlədən ARDNŞ-in balansında olan neft bazaları qanunvericiliklə nəzərdə tutulmuş qaydada özəlləşməyə açıq elan edilərək özəlləşdirilmişdir.

"Enerji sektorunda maliyyə intizamının gücləndirilməsi Proqramı"na əsasən ARDNŞ strukturuna daxil olan qurumların, xüsusilə də Sosial İnkişaf İdarəsinin  balansındakı və bilavasitə şirkətin fəaliyyət sahəsi ilə əlaqədar olmayan obyektlər, əmlak kompleksləri onlara aid infrastrukturla birlikdə qanunvericiliklə müəyyən edilmiş qaydada əvəzsiz olaraq aidiyyəti mərkəzi və yerli icra hakimiyyəti orqanlarının, qurumların balansına verilmişdir. Bunlardan savayı, müvafiq mərkəzi və yerli icra hakimiyyəti orqanlarının, müəssisələrin razılaşdırılmış təklifləri nəzərə alınmaqla Nazirlər Kabinetinin müvafiq sərəncamlarına əsasən ARDNŞ-in balansından çıxarılmış digər obyektlərin siyahısı da hazırdır. Onların sırasına Daxili İşlər Nazirliyinin aidiyyəti struktur bölmələrinin istifadəsinə verilmiş binalar, Səhiyyə Nazirliyinin aidiyyəti struktur bölmələrinin istifadəsinə verilmiş qeyri-yaşayış sahələri, "Azərikimya" İstehsalat Birliyi Səthi Aktiv Maddələr Zavodunun balansında olan yarımstansiya, Gəncə Müalicə-Diaqnostika Mərkəzinin torpaq sahəsi və əmlakı, Mərkəzi Neftçilər Xəstəxanası, xəstəxananın 240 çarpayılıq yarımçıq tikilisi, eləcə də Lənkəran, Şirvan, Qəbələ, Füzuli, Quba, Qazax, Bərdə, Cəlilabad, Zaqatala, Şamaxı müalicə-diaqnostika mərkəzləri və digər obyektlər daxildir.