Ev insanın özünü güvəndə hiss etdiyi məkandır. Yorğun iş günlərinin, uzun səyahətlərin stresini üzərimizdən ata biləcəyimiz yerdir.

Zaman-zaman, habelə mövsümlərdən asılı olaraq evin rahatlığıyla bağlı bəzi istəklərimiz olur, kaş biz evə dönərkən yayda sərin, qışda isti olaydı, mənzilə daxil olarkən işıqlar avtomatik yanıb sönəydi... və s. Müasir texnologiyanın əldə etdiyi nailiyyətlər ilə bu arzular indi əlçatmaz deyil. “Ağıllı ev”lər məhz bunun üçün nəzərdə tutulub.

“Ağıllı ev” sistemləri yaşayış yerində və ya ofisdə təhlükəsizliyi təmin etmənin və enerjidən qənaətlə istifadənin ən səmərəli yoludur. Bu cür sistemlər elektrik enerjisinin sərfiyyatı, otaqlardakı istiliyin və hərəkət sensorlarının tənzimlənməsi, qapı və jalüzlərin idarə olunması, havanın təmizlənməsi və həyəcan siqnalının işə düşməsi kimi bir çox funksiyanı yerinə yetirir.

Rastlaşdığımız və yararlandığımız texnoloji nailiyyətlərin demək olar ki, hamısını insanlar ilk dəfə məhz fantastik kitab, jurnal və filmlərdə görüblər. Nə vaxtsa xəyal görünən cihazlar artıq günümüzün reallığıdır.

İlk dəfə “Ağıllı ev” ideyası ABŞ yazıçısı Rey Bredberinin 1950-ci ildə işıq üzü görmüş “The Veldt” adlı hekayəsində irəli sürülüb. Daha sonra,  1999-cu ildə “Disney” şirkəti tərəfindən ekranlaşdırılmış “Smart Home” (“Ağıllı ev”) filmində gündəmə gətirilib.

Bütün bunlar bir daha sübut edir ki, vaxtilə insanlara qeyri-mümkün, reallıqdan uzaq görünən, “texnoloji uydurmalar” və “xülyalar” bir gün reallığa çevrilib sürətlə həyatımıza daxil ola bilər.