AÇG üçün doqquzuncu platforma tikilir
Pandemiya dövründə layihə üzrə işlər vəziyyətə uyğunlaşdırılmaqla fasiləsiz aparılır
1994-cü ilin sentyabr ayında “Azəri-Çıraq-Günəşli”nin (AÇG) tammiqyaslı işlənməsi müqaviləsi imzalanarkən tərəfdaşlar bu yataqların təxmini ehtiyatlarının 511 milyon ton olduğunu bildirmişdilər.
İndi mütəxəssislər burada sərvətin daha çox - ən azı 1 milyard ton olduğu fikrini söyləyirlər.
2017-ci ilin sentyabr ayında AÇG-nin birgə işlənməsi və hasilatın pay bölgüsü haqqında dəyişdirilmiş və yenidən işlənmiş sazişin imzalanması da bu amilə əsaslanır. Yeni saziş 2050-ci ilin əvvəlinədək davam edəcək.
Hazırda bu müqaviləyə əsasən, “Azəri Mərkəzi Şərqi” (ACE) layihəsi çərçivəsində quruda və dənizdə bir sıra tikinti-quraşdırma işləri həyata keçirilir. Koronavirus pandemiyasının yaratdığı çətinliklərə və məhdudiyyətlərə baxmayaraq, digər neft-qaz layihələrində olduğu kimi, ACE-də də işlər vəziyyətə uyğunlaşdırılmaqla fasiləsiz aparılır.
bp Azərbaycan şirkətinin məlumatına görə, bu ilin birinci rübünün sonuna layihə üzrə müfəssəl mühəndis-layihələndirmə işləri ümumilikdə başa çatıb. İri avadanlıq yüklərinin və irihəcmli materialların Bakıya daşınması da tikinti-quraşdırma işlərinin qrafikinə uyğun həyata keçirilib. Belə ki, hazırda “Azəri Mərkəzi Şərqi” layihəsi çərçivəsində eyni adlı platforma inşa edilir. Platformanın üst modullarının və qazma avadanlıqlarının istehsal-quraşdırma işləri Bibiheybətdəki tikinti sahəsində aparılır. Çoxsaylı əməliyyatların daxil olduğu ağır yüklərin qaldırılması proqramı indiyədək uğurla irəliləyib. Eləcə də mexaniki avadanlıq dəstlərinin quraşdırılması davam edib, boru xətlərinin quraşdırılması, dikəldilməsi və kabellərin çəkilməsi işlərinə başlanıb. Plan üzrə nəzərdə tutulan mexaniki avadanlıq dəstlərinin yoxlanılması və bəzi digər avadanlıqların çatdırılması işləri yerinə yetirilib. Yaşayış modullarının və əsas gəmi yüklərinin çatdırılması işləri də plan üzrə gedib. Belə ki, yaşayış modulları İsveçdən artıq yola salınıb və onların yaxın vaxtda Bakıya çatacağı gözlənilir.
Birinci rübdə Heydər Əliyev adına Bakı Dərin Özüllər Zavodunda dayaq blokunun tikintisi həm quraşdırma sexlərində, həm də stapelin üzərində olmaqla bütün sahələrdə davam edib. Sualtı qurğuların və birləşdirici dirsəklərin istehsal-quraşdırma işləri də qrafiklə irəliləyib.
Bu müddət ərzində layihənin dəniz işlərinin həmçinin bir sıra digər hissələri yerinə yetirilib. Bunlara lay sularının idarə olunması ilə bağlı “Mərkəzi Azəri” platformasında aparılan işlər və növbəti əməliyyatlara hazırlıq daxildir.
Adətən hər yeni platformadan hasilatı qəbul etmək üçün Səngəçal terminalında müəyyən avadanlıqlar quraşdırılır və s. Bu baxımdan ACE də istisna təşkil etmir. Belə ki, terminalda yerləşəcək ACE nəzarət otağının layihələndirilməsi tamamlanıb və planlaşdırılmış modifikasiya işlərinə bu ilin dördüncü rübündə başlanacaq.
Ümumilikdə 2023-cü ildə ACE layihəsindən ilk hasilatı əldə etmək üçün həyata keçirilən mühəndis-layihə, tədarük və istehsal-quraşdırma işləri qrafikə uyğun davam edir.
“Azəri Mərkəzi Şərqi” AÇG-nin 9-cu platforması olacaq. Hazırda yataqda 8 platforma fəaliyyət göstərir. Bunlardan 6-sı hasilat, 2-si isə emal, qazın kompressiyası, suvurma və texnoloji təchizat qurğusudur.
İlin ilk üç ayında AÇG-dən, ümumilikdə təxminən 44 milyon barel, yəni 6 milyon ton neft hasil edilib. Gündə orta hesabla “Çıraq”dan 30 min, “Mərkəzi Azəri”dən 112 min, “Qərbi Azəri”dən 130 min, “Şərqi Azəri” 79 min, “Dərinsulu Günəşli”dən 89 min və “Qərbi Çıraq”dan 44 min barel neft alınıb. Beləliklə, AÇG-nin gündəlik orta hasilatı 484 min barel təşkil edib.
Xatırladaq ki, AÇG-də iştirak payları belədir: bp (30,37 faiz), SOCAR (25 faiz), MOL (9,57 faiz), İNPEKS (9,31 faiz), “Ekvinor” (7,27 faiz), “EksonMobil” (6,79 faiz), TPAO (5,73 faiz), İTOÇU (3,65 faiz), ONGC Videş Limited (2,31 faiz). AÇG üzrə Hasilatın Pay Bölgüsü Sazişinin podratçı tərəfləri adından “BP Exploration (Caspian Sea) Limited” şirkəti operatordur.
Qeyd edək ki, Azərbaycanın qaz potensialının da önəmli hissəsi AÇG yataqları hesabına formalaşır. Buradan çıxarılan səmt qazının bir hissəsi layların təzyiqini saxlamaq üçün yenidən kollektora vurulur. Mavi yanacağın xeyli hissəsi isə Azərbaycanın daxili istifadəsi üçün Səngəçal terminalından SOCAR-a məxsus kəmərlə “Azəriqaz” şəbəkəsinə ötürülür. Məsələn, cari ilin ilk rübü ərzində AÇG-dən SOCAR-a əsasən Səngəçal terminalı, həmçinin “Neft Daşları”ndakı qurğu vasitəsilə gündə orta hesabla 11,6 milyon kubmetr, ümumilikdə isə 1 milyard kubmetr səmt qazı verilib. Hasil edilən səmt qazının qalan hissəsi adəti üzrə yenidən laylara vurulub.
Beləliklə, AÇG 27 ilə yaxındır etibarlı tərəfdaşlıq, ekoloji baxımdan zərərsiz əməliyyatlar sayəsində təhlükəsiz işlənir və 23 ildən çoxdur ahəngdar şəkildə neft-qaz verir. Hazırda bu yataqlar blokundan hasil edilən neft və səmt qazı platformalardan sualtı xətlər vasitəsilə Səngəçal terminalına çatdırılır və karbohidrogenlər istehlakçılara buradakı ixrac marşrutları ilə yola salınır.
Prezident İlham Əliyev “Azəri-Çıraq-Günəşli”də hasilatın sabit saxlanılmasının vacib məsələ olduğunu qeyd edərək dəfələrlə vurğulamışdır ki, bu yataqlar bizim əsas gəlir mənbəyimizdir və bunu hər kəs bilməlidir.
Qeyd edək ki, AÇG yataqlar blokunun işlənməsi layihəsinin reallaşdırılması çərçivəsində cari ilin ilk üç ayında 953 milyon 498 min dollar gəlir əldə olunub. Azərbaycan Respulikası Dövlət Neft Fondunun (ARDNF) İctimaiyyətlə əlaqələr departamentinin bu məlumatında həmçinin bildirilir ki, AÇG layihəsi üzrə keçən ildəki gəlir 3 milyard 522,7 milyon dollar təşkil edib. Beləliklə, AÇG Azərbaycan iqtisadiyyatının dayaq sütunlarından biri olaraq qalır.
Flora SADIQLI,
“Azərbaycan”
Digər Xəbərlər
QƏZETİN ÇAP VERSİYASI
XƏBƏR LENTİ Bütün xəbərlər
Gözəlliyi rənglərə köçürən rəssam
25 Aprel
Şuşa xanəndəlik məktəbinin nümayəndələrindən biri - Seyid Şuşinski
25 Aprel
Mədəniyyət beşiyi
25 Aprel
COP29 Azərbaycan üçün böyük fürsətdir
25 Aprel
COP29 ərəfəsində "yaşıl külək"
25 Aprel
"Türkiyə-Azərbaycan birliyi regional təhlükəsizliyin və sabitliyin mühüm meyarıdır"
25 Aprel
Azərbaycan-Çin əlaqələri dostluğa və qarşılıqlı maraqlara söykənir
25 Aprel
Sahibkarlar iqtisadi inkişafın aparıcı qüvvəsidir
25 Aprel
"Delimitasiya Hayastanın xilası olacaq"
25 Aprel
Sahibkarlığın bugünkü inkişafı düşünülmüş dövlət siyasətinin nəticəsidir
25 Aprel
DİQQƏT ÇƏKƏNLƏR
ÇOX OXUNANLAR
OXUCU MƏKTUBLARI
NƏŞRLƏRİMİZ
BAŞ REDAKTORDAN
Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!