22 Fevral 2020 06:29
1057
MSK
A- A+

2020-ci il fevralın 9-da keçirilmiş Azərbaycan RespublikasınınMilli Məclisinə seçkilərdə Mərkəzi Seçki Komissiyasına daxil olmuş 18 fevral 2020-ci il tarixli 277 saylı müraciətə baxılması barədə Azərbaycan Respublikası Mərkəzi Seçki Komissiyasının Qərarı


QƏRAR № 29/339


2020-ci il fevralın 9-da keçirilmiş Azərbaycan Respublikasının Milli Məclisinə (Milli Məclis) seçkilərdə 24 saylı Nizami birinci seçki dairəsi üzrə qeydə alınmış namizədlər Yaqublu Nəsiman Qara oğlu və Mirzəliyev İlham Nurəddin oğlu 2020-ci il fevralın 18-də Azərbaycan Respublikasının Mərkəzi Seçki Komissiyasına (Mərkəzi Seçki Komissiyası) adıçəkilən seçki dairəsi dairə seçki komissiyasının 13 fevral 2020-ci il tarixli 62/251 saylı qərarını mübahisələndirərək həmin qərarla razılaşmadıqlarını və faktların yenidən araşdırılmasını xahiş etmişlər.

Müraciət Azərbaycan Respublikası Seçki Məcəlləsinin (Seçki Məcəlləsinin) 112-ci, 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın tələblərinə uyğun olaraq Mərkəzi Seçki Komissiyasının nəzdində ekspert qrupunun üzvü tərəfindən icraata qəbul edilmiş, araşdırılaraq rəy verilmiş və komissiyanın iclasında baxılmışdır.

N.Yaqublu və İ.Mirzəliyev müraciətdə göstərmişlər ki, 2020-ci il fevralın 9-da Milli Məclisə keçirilmiş seçkilərdə 24 saylı Nizami birinci seçki dairəsinin seçki məntəqələrindəki pozuntularla əlaqədar namizəd olaraq yazdıqları şikayəti dairə seçki komissiyasına göndərmişlər. 2020-ci il fevralın 17-də dairə seçki komissiyasının rəsmi cavabı onlara çatdırılmışdır. Həmin cavabla razılaşmadıqlarını və faktların yenidən araşdırılmasını xahiş etmişlər.

Araşdırma ilə əlaqədar müraciət etmiş namizədlərlə əlaqə saxlanılmış, araşdırma və iclasda iştirak etmək, həmçinin digər hüquqlarının olması izah edilmiş, onların araşdırmada və Komissiyanın iclasında iştirakı təmin edilmişdir.

Dairə seçki komissiyasından mübahisələndirilən qərarın çıxarılması üçün əsas olmuş sənədlər alınaraq araşdırılmış və müəyyən edilmişdir ki, namizədlər tərəfindən 2020-ci ilin fevralın 10-u və 11-də seçki günü seçki məntəqələrində baş verməsi iddia olunan pozuntularla bağlı eyni məzmunlu ərizə ilə dairə seçki komissiyasına və Mərkəzi Seçki Komissiyasına müraciət edilmişdir. Mərkəzi Seçki Komissiyası qeyd edilən müraciəti aidiyyəti üzrə dairə seçki komissiyasına göndərmişdir. Dairə seçki komissiyası daxil olmuş müraciət üzrə hazırda mübahisələndirilən qərarı qəbul etmişdir.

Namizədlər tərəfindən seçki günü tərtib edilməsi iddia olunan, müraciətə əlavə edilmiş aktların araşdırılması ilə əlaqədar seçki dairəsinin mübahisələndirilən seçki məntəqələrində müşahidə aparmış müşahidəçilərdən, komissiya üzvlərindən və digər seçki subyektlərindən alınmış izahatlardan müəyyən edilmişdir ki, qeyd edilən pozuntu halları baş verməmişdir. Belə ki, 1 və 7 saylı seçki məntəqələri üzrə səsvermənin nəticələrinə dair protokolların surətinin müşahidəçilərə verilməməsi ilə bağlı həmin seçki məntəqələrində müşahidə aparmış Tahir Qocayevin səsvermə bülletenlərinin sayılıb qurtarmasını gözləmədən məntəqəni tərk etməsi, Səidə Mirzəlinin isə səsvermə başa çatmamış saat 18:00-da səsvermənin nəticələrinə dair protokolun surətini tələb etməsi müəyyən edilmişdir. 7 saylı seçki məntəqəsində müşahidə aparan Yasəmən Qurbanovanın yaşlı bir seçiciyə kömək etmək adı ilə səsvermə kabinəsinə daxil olması və kimə səs verəcəyini ona deməsi, həmin gün qeyd edilən seçki məntəqəsində Yasəmən Qurbanova adlı müşahidəçinin qeydə alınmaması barədə tərtib edilmiş aktla təkzib olunmuşdur. Həmin məntəqədə müşahidə aparmış Mirzəli Səidə İlham qızının digər müşahidəçi İsmayılov Xanlar İldırım oğlu barədə şikayəti Səidə Mirzəlinin ayaq üstə gəzərək müşahidə aparılmasına maneçilik törətməsi ilə bağlı olmuşdur.

Dairə seçki komissiyasının araşdırması ilə müəyyən edilmişdir ki, müşahidəçi tərəfindən seçicinin şəxsiyyət vəsiqəsinin tələb edilməsi müşahidəçilərin deyil, seçicilərin etirazına səbəb olmuşdur. Həmçinin sözügedən seçki dairəsinin hüdudları daxilində yaşamayan seçicinin həmin dairə üzrə seçki məntəqələrində səs verməsi iddiası öz təsdiqini tapmamışdır. Belə ki, toplanılmış sənədlərə əsasən səsvermədə iştirak hüququ mübahisələndirilən seçicilərin seçki məntəqəsi ərazisində yaşaması müəyyən edilmişdir.

Namizədlərin müraciətinin araşdırılması ilə əlaqədar səsvermə günü və sonrakı günlərdə sosial şəbəkələrdə seçki məntəqələrində baş verməsi iddia edilən pozuntularla bağlı yayımlanmış görüntülərə baxış keçirilmiş, 24 saylı Nizami birinci seçki dairəsinin seçki məntəqələri üzrə hər hansı bir görüntü müəyyən edilməmişdir. Eyni zamanda həmin seçki dairəsinin veb-kameralar quraşdırılmış seçki məntəqələrində də seçki pozuntusu qeydə alınmamışdır. Həmçinin seçki məntəqələri üzrə səsvermənin nəticələrinə dair protokolların araşdırılması zamanı məlumatlarda uyğunsuzluq aşkar edilməmişdir.

Araşdırmaya məcmu halda qiymət verilərək qeyd edilməlidir ki, dairə seçki komissiyası namizədlər N.Yaqublu və İ.Mirzəliyevin müraciətini obyektiv, hərtərəfli və qərəzsiz araşdıraraq təmin edilməməsi barədə düzgün nəticəyə gəlmişdir.

Beləliklə, araşdırmanın nəticəsi olaraq müraciətin təmin edilməsi üçün hüquqi əsaslar mövcud olmadığından, müraciət təmin edilməməli, dairə seçki komissiyasının qərarı dəyişdirilmədən qüvvədə saxlanılmalıdır.

Yuxarıda göstərilənləri əsas götürərək, Mərkəzi Seçki Komissiyası Azərbaycan Respublikası Seçki Məcəlləsinin 19.4-cü, 28.2-ci, 112-ci, 112-1-ci maddələrinə və "Azərbaycan Respublikasının Mərkəzi Seçki Komissiyasına və dairə seçki komissiyalarına seçki hüquqlarının pozulması ilə əlaqədar şikayət və müraciətlərin verilməsi və onlara baxılması qaydaları haqqında Təlimat”ın 1-ci, 2-ci, 4-cü, 6-cı və 7-ci hissələrinə əsasən qərara alır:

1. 2020-ci il fevralın 9-da keçirilmiş Milli Məclisə seçkilərdə 24 saylı Nizami birinci seçki dairəsi üzrə qeydə alınmış namizədlər Yaqublu Nəsiman Qara oğlu və Mirzəliyev İlham Nurəddin oğlunun Mərkəzi Seçki Komissiyasına daxil olmuş 18 fevral 2020-ci il tarixli 277 saylı müraciəti əsassız olduğundan təmin edilməsin, həmin dairə seçki komissiyasının 13 fevral 2020-ci il tarixli 62/251 saylı qərarı dəyişdirilmədən saxlanılsın.

2. Bu Qərar dərc edildiyi gündən qüvvəyə minir.

Sədr Məzahir Pənahov

Katib Arifə Muxtarova

Katib Mikayıl Rəhimov

21.02.2020-ci il

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video