150 ölkədən olan 14 mindən çox alim iqlim böhranı ilə əlaqədar siyasətdə təcili dəyişikliklər edilməsinə çağırmışdır. Onlar “BioScience” jurnalında dərc olunmuş məqalədə vurqulayırlar ki, bu dəyişikliklər Yer üzündə həyatın qorunması üçün son dərəcə aktualdır. Söhbət mədən növlü yanacaqdan imtina edilməsindən və biomüxtəlifliyin daha yaxşı müdafiə olunmasından getməlidir.

Yazının müəllifləri 2 il öncə də analoji məktubda “iqlim sahəsində yaranmış qlobal fövqəladə vəziyyət” barədə xəbərdarlıq etmişlər. O vaxt tədqiqatçılar bildirmişlər: “Əgər insanların iqlimin dəyişməsinə rəvac verən istixana qazlarının tullantıları və digər faktorlarla bağlı davranışı fundamental şəkildə və birdəfəlik dəyişməsə, sözlə ifadə olunmayan insan əzablarının qarşısını almaq bundan sonra mümkün olmayacaq”.

Həmin vaxtdan bəri daşqınlar, yanğınlar, Yer atmosferi temperaturunun kəskin yüksəlməsi kimi çoxsaylı hadisələr baş vermişdir. Və bunlar aydın şəkildə hazırkı siyasətin davam etməsinin fəsadlarını göstərmişdir. Məsələn, tədqiqatçıların məlumatına görə, ötən il meteomüşahidələr tarixində ikinci ən isti il olmuşdur. Cari ilin aprel ayında iqlim üçün ziyanlı olan karbon qazı və metanın Yer atmosferində konsentrasiyası əvvəlki dövrlərlə müqayisədə daha yüksək olduğu qeydə alınmışdır.

Müraciət müəlliflərindən biri, ABŞ-ın Massaçusets ştatındakı “Woodwell Climate Reesearch Center” Elmi Mərkəzinin mütəxəssisi Filip Daffiinin fikrincə, son bir neçə il və hətta son bir neçə həftə ərzində müşahidə olunan ekstremal iqlim hadisələri böhranla mübarizənin dərhal başlanmasını labüd edir.

Tədqiqatçılar Yerin vəziyyətinin göstəricisi, o cümlədən buzlaqların qalınlığı, dəniz buzunun və meşələrin sahəsi kimi 31 “həyati əhəmiyyətli vacib indikator”u öyrənmişlər. Onlar 31 parametrdən 18-də neqativ rekord göstəricilər qeydə almışlar. Məsələn, buzlaqlar 15 il əvvəl olduğundan 31 faiz sürətlə əriyir. Qlobal dəniz səviyyəsi və dəniz suyunun temperaturu indiyədək heç vaxt olmadığı kimi yüksəkdir.