31 il öncə Ulu Öndər Heydər Əliyevin çağırışı ilə Azərbaycan Ordusunun müzəffər yürüşünün bünövrəsi qoyuldu
Ulu Öndər Heydər Əliyevin dövlət və xalq qarşısında ən böyük xidmətlərindən biri ordu quruculuğu ilə bağlıdır. Məhz Heydər Əliyevin yaratdığı nizami və vahid komandanlığa əsaslanan ordu Ermənistanın təcavüzkar hücumlarının qarşısını almış və cəbhənin müxtəlif istiqamətlərində torpaqlarımızı işğaldan azad etmişdi. Ordumuzun həmin şərəfli zəfər yürüşü Ulu Öndərin 1993-cü il noyabr ayının 2-də xalqa müraciətindən sonra başlamışdı.
Heydər ƏLİYEV: "İndi bizim ordumuz yaranmalı və qurulmalıdır"
Dövlətin və dövlətçiliyin sütunlarından biri ordudur. Lakin təəssüflə qeyd etməliyik ki, ötən əsrin 90-cı illərinin əvvəllərində hakimiyyətdə olan qüvvələr ordu quruculuğu işini düzgün apara bilmədilər. Özünümüdafiə batalyonları düşmənlə ayrı-ayrılıqda qəhrəmancasına döyüşsələr də, vahid komandanlığın həyata keçirilməməsi, dövlət dəstəyinin olmaması, ölkədəki siyasi çəkişmə öz sözünü deyirdi. Ən böyük problemlərdən biri yaradılmış hərbi hissələrin ayrı-ayrı şəxslərin nəzarətində olması və onların siyasi və konyunktur maraqlarına xidmət etməsi idi. Bütün bunlar nəticə etibarilə torpaqlarımızın müdafiəsinin düzgün təşkil edilməməsinə və işğalına gətirib çıxardı.
Ulu Öndər Heydər Əliyev 1993-cü ildə siyasi hakimiyyətə gələndə faktiki olaraq ordu yox idi. Buna qədər hakimiyyətdə olmuş siyasi qüvvələrin yarıtmaz idarəçilikləri təməli düzgün qoyulmayan ordu quruculuğunu iflasa uğratmışdı. Dağınıq və pərakəndə şəkildə olan hərbi hissələr qarşılarında dayanan vəzifələri yerinə yetirmək iqtidarında deyildilər, torpaqlarımız müdafiəsiz qalmışdı. Ona görə Heydər Əliyevin ilk həyata keçirdiyi tədbirlərdən biri Ermənistanın artan hücumlarının qarşısını almaq oldu. Düşmənin ərazilərimizə yeni hücumları və təcavüzü ilə bağlı Ulu Öndər Heydər Əliyevin 1993-cü il noyabrın 2-də televiziya və radio ilə xalqa müraciəti həm də Azərbaycanda ordu quruculuğunun başlanğıcı oldu. Tarixi müraciətində "İndi bizim ordumuz yaranmalı və qurulmalıdır" deyən Heydər Əliyev hamını bu yolda fədakar mübarizəyə, Azərbaycanın müdafiəsinə qalxmağa çağırdı. Məhz bu müraciət Azərbaycanda Prezident Heydər Əliyevin Ali Baş Komandanlığı ilə yeni ordu quruculuğunun əsasını qoydu.
Heydər Əliyev böyük uzaqgörənliklə ordu quruculuğuna mərkəzi komandanlığa tabe olmayan bütün hərbi hissələrin buraxılması ilə başladı. Qısa zamanda vahid komandanlığa əsaslanan yeni hərbi hissələrin formalaşdırılması, torpaqlarımızın müdafiə olunması üçün genişmiqyaslı tədbirlərin həyata keçirilməsi tezliklə cəbhə xəttindəki vəziyyətdə özünü göstərdi. 1993-cü ilin sonu, 1994-cü ilin əvvəllərində Füzuli istiqamətində, Murovda uğurlu əməliyyatlar həyata keçirildi, işğal olunmuş bəzi yaşayış məskənləri, strateji yüksəkliklər düşməndən azad edildi.
1994-cü ildə atəşkəs sazişinin imzalanmasından sonra Azərbaycanda ordu quruculuğu, ölkənin müdafiə qabiliyyətinin artırılması istiqamətində görülən işlər yeni fazaya daxil oldu. Hərbi hissələrin, ayrı-ayrı qoşun növlərinin formalaşdırılması başa çatdırıldı. Döyüş qabiliyyətinin və peşəkarlığın artırılması, hərbi təhsilin müasir standartlar səviyyəsinə çatdırılması Azərbaycan Silahlı Qüvvələrini yeni keyfiyyət mərhələsinə yüksəltdi.
Ordumuz xalqımızın qürur mənbəyidir
2003-cü ildən respublikamıza rəhbərlik etməyə başlayan Prezident İlham Əliyev Silahlı Qüvvələrimizin döyüş imkanlarının artırılmasını daim diqqət mərkəzində saxladı, bu istiqamətdə davamlı şəkildə hərbi islahatlar həyata keçirdi. Azərbaycan Silahlı Qüvvələrində baş verən keyfiyyət dəyişikliklərini, döyüş qabiliyyətinin ən modern səviyyəyə çatdırılmasını keçirilən paradlarda nümayiş etdirilən texnikalar da təsdiq edirdi. Bu illər ərzində Azərbaycanın artan maliyyə imkanları ordumuzun daha da güclənməsinə böyük təsir göstərdi, hər il dövlət büdcəsindən müdafiəyə ayrılan xərclər artırıldı.
Eyni zamanda torpaqlarımızın işğal altında olduğu dövrdə Azərbaycan dövləti sülh danışıqları nəticəsiz qalacağı təqdirdə ərazilərimizin güc yolu ilə azad edəcəyini hər zaman bəyan edirdi. 2016-cı ilin aprelində ermənilərin cəbhə xəttində törətdikləri təxribatlardan sonra baş verən döyüşlər göstərdi ki, Azərbaycan güc yolu ilə ərazilərini işğaldan azad etməyə qadirdir. Ordumuzun qələbəsi ilə başa çatan Aprel döyüşləri Azərbaycanda həyata keçirilən ordu quruculuğunun effektiv nəticəsini təsdiq etdi.
2020-ci ilin 44 günlük Vətən müharibəsi və 2023-cü ilin antiterror tədbirləri isə bütün tərəfləri ilə yanaşı, hər biri ayrı-ayrılıqda Prezident İlham Əliyev tərəfindən həyata keçirilən modern ordu quruculuğunun ən möhtəşəm təntənəsinə çevrildi. Torpaqlarımızın azad olunması, ərazilərimizdəki erməni separatizminin məhv edilməsi ilə başa çatan bu hadisələr nəticəsində bütün dünya gördü ki, Azərbaycan güclü, peşəkar və ən müasir döyüş imkanlarını mənimsəmiş hərbi gücə, qüdrətli orduya sahibdir. Hansı ki bu ordu işğalçı Ermənistanın qoşunlarının 30 ilə yaxın müddətdə yaratdığı və möhkəmləndirdiyi bir neçə mərhələli mühəndis-istehkam qurğularını ilk həmlədəcə keçərək, qarşısında dayanan vəzifələri layiqincə yerinə yetirdi.
Bütün bu zəfərlərimizin təməli 1993-cü ildə qoyulub. 31 il öncə noyabrın 2-də Ulu Öndər Heydər Əliyevin çağırışı ilə Azərbaycan Ordusunun müzəffər yürüşünün təməl daşı atıldı. Ulu Öndər Heydər Əliyevin yaratdığı və gücləndirdiyi, Prezident İlham Əliyevin döyüş imkanlarını ən modern səviyyəyə yüksəltdiyi ordumuz xalqımızın qürur mənbəyidir.
Rəşad CƏFƏRLİ,
"Azərbaycan"
jpg_1763137673.jpg)
