Daşkəsəndə Vətən müharibəsi şəhidləri - gizir Novruz İsmayılov və kiçik gizir Şəhriyar Abdullayevin xatirələri ehtiramla yad edilib.
Daşkəsən Rayon İcra Hakimiyyəti və hüquq-mühafizə orqanları rəhbərlərinin, şəhidlərin ailə üzvlərinin, müharibə veteranlarının, ictimaiyyət nümayəndələrinin iştirakı ilə keçirilən tədbirdə çıxış edən RİH-in başçısı Orxan Abbasov Prezident, Müzəffər Ali Baş Komandan
İlham Əliyevin rəhbərliyi ilə Vətən müharibəsində qazanılan şanlı Zəfərin tarixi əhəmiyyətindən danışmış, şəhid ailələrinə, qazilərə göstərilən diqqət və qayğıdan söhbət açmışdır.
Anım mərasimində qeyd edilmişdir ki, Novruz İsmayılov 1987-ci il oktyabrın 13-də Daşkəsənin Zinzahal kəndində anadan olmuşdur. Vətən müharibəsində Xocavəndin və Füzulinin azadlığı uğrunda gedən döyüşlərdə qəhrəmanlıq göstərən gizir N.İsmayılov 2020-ci il oktyabrın 30-da Füzuli uğrunda gedən döyüşlər zamanı müqəddəs şəhidlik zirvəsinə ucalmışdır. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Prezident İlham Əliyevin sərəncamları ilə ölümündən sonra "Vətən uğrunda", "Cəsur döyüşçü", "Füzulinin azad olunmasına görə", "Xocavəndin azad olunmasına görə" medalları və hərbi xidmətdə xüsusi xidmətlərinə görə 3-cü dərəcəli "Vətənə xidmətə görə" ordeni ilə təltif edilmişdir. Qız övladı yadigar qalıb.
Şəhriyar Abdullayev isə 1987-ci il martın 2-də Tərtərin Cəmilli kəndində anadan olmuşdur. Azərbaycan Ordusunun kiçik giziri idi. Cəbrayılın, Kəlbəcərin və Füzulinin azadlığı uğrunda gedən döyüşlərdə nümunə göstərən Ş.Abdullayev 2020-ci il oktyabrın 13-də Hadrut döyüşləri zamanı şəhid olmuşdur.
50-yə yaxın düşmən döyüşçüsünü məhv edən Şəhriyar Prezident İlham Əliyevin sərəncamları ilə ölümündən sonra "Vətən uğrunda", "Cəbrayılın azad olunmasına görə", "Kəlbəcərin azad olunmasına görə", "Füzulinin azad olunmasına görə", "Hərbi xidmətlərə görə" medalları və "Azərbaycan Bayrağı" ordeni ilə təltif edilmişdir.
Sabir ƏLİYEV,
"Azərbaycan"
