Qalaktikanın öyrənilməsində başlıca komponentlərdən olan teleskop orta əsrlərdə kəşf edilmişdi. Bu ixtira planetimizin kosmosdakı yerini müəyyən etmək üçün xüsusi əhəmiyyətə malik olmuşdu. Hazırda astronomiyanın ən vacib tədqiqat vasitələri sırasında yer alan teleskoplarla kainatın ən ucqar nöqtələrindəki dəyişiklikləri belə araşdırıb meydana çıxarmaq mümkündür.

İlk teleskopun yaranma sədası Hollandiyadan gəlib. 1608-ci ildə hazırlanan və patentləşdirilən icadın müəllifi eynək istehsalçısı Hans Lippersheydir. Bununla təsvirlər 3-4 dəfəyə qədər böyüdülə bilirdi. Bir hekayədə bəhs olunur ki, ixtiraçı bu fikrə iki uşağın linzaları tutub uzaqdakı küləyi görmək üçün istifadə etdikləri zaman gəlib.

Bu yenilikdən bir il sonra Qalileo Qaliley H.Lippersheyin ixtirasından xəbər tutaraq öz teleskopunu hazırlayıb. O, Hansın hazırladığı cihazı heç vaxt görməsə də, öz nümunəsi üzərində əhəmiyyətli təkmilləşdirmələrə nail olmuşdu. O, ərsəyə gətirdiyi teleskopla təsvirləri 20 dəfəyə qədər böyüdə bilmişdi. Teleskopu göyə doğru yönəldən ilk şəxs Qaliley idi. Bunun nəticəsində o, ayın krater səthlərini ayırd etməyə, fazalarını ətraflı şəkildə çəkməyə və hətta Süd Yolunu təsvir etməyə nail olmuşdu. Həmçinin Saturnun halqalarını, sonsuzluğa uzanan ulduzlar kainatını, günəş ləkələrini və Yupiterin dörd peykini də müəyyənləşdirmişdi.

İlk nəhəng reflektor teleskop 1789-cu ildə İngiltərədə William Herschel tərəfindən qurulub. Onun uzunluğu 12 metr olmuşdu. Ölçüsü uğurlu alınsa da, bır sıra problemləri özündə cəmləşdirən cihaz astronomik müşahidələr üçün əlverişli hesab edilməmişdi. 1800-cü illərdən etibarən isə daha uğurlu versiyalar təqdim olunmağa başlanmışdı.