Qərbin qərəzli siyasəti Azərbaycanın Avropa Şurasını tərketmə ehtimalını artırır

Azərbaycan Cənubi Qafqazın lider ölkəsi olması, etibarlı tərəfdaş, güvənilən ölkə kimi gündən-günə beynəlxalq nüfuzunun artması, ən əsası siyasi sabitlik mərkəzinə çevrilməsi ilə qərəzli Qərb təsisatlarının hədəfinə çevrilib. Buna görədir ki, erməni lobbisinin sözü ilə oturub duran rüşvətxor Qərb siyasətçiləri sistemli şəkildə respublikamıza qarşı qarayaxma kampaniyası aparırlar. 

Ölkəmizin COP29 kimi mötəbər beynəlxalq tədbirə evsahibliyi edəcəyi bu ərəfədə anti-Azərbaycan təbliğatı xüsusilə gücləndirilib. Qərbdən başladılan "xaç yürüşü"nün önündə isə hazırda formal olaraq Avropa Şurası Parlament Assambleyasının (AŞPA) üzvü, almaniyalı deputat Frank Şvabe gedir. Əslində, Şvabenin Fransa və Almaniyanın sözü ilə oturub-duran oyuncaq fiqur olduğu da gün kimi ortadadır. 

Məkrli niyyət

Bu ilin yanvarında AŞPA-da ölkəmizin nümayəndə heyətinin etimadnamələri təsdiq edilmədi və bu qalmaqallı təşəbbüs də məhz Almaniya Bundestaqının Sosial-Demokrat Partiyasından olan üzvü Frank Şvabe tərəfindən irəli sürülmüşdü. Ancaq həmin vaxt Azərbaycan nümayəndə heyəti özü AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəlmişdi. Sonrakı müddətdə də almaniyalı deputat Azərbaycanla bağlı davamlı böhtan xarakterli çıxışlar etmişdi. O, avqust ayında KİV-ə verdiyi müsahibəsində guya Azərbaycanın Avropa Şurasında üzvlükdə maraqlı olmadığını bildirmiş, ölkəmizi Avropa Şurasının təbliğ etdiyi dəyərlərə sadiq olmamaqda ittiham etmişdi. 

Eləcə də bu yaxınlarda ermənipərəst siyasətçi guya Azərbaycanda "siyasi məhbus" probleminin olduğunu iddia edib. Ancaq o özü də yaxşı bilir ki, ölkəmizdə siyasi məhbus yoxdur və onun siyasi məhbus kimi qələmə verdiyi şəxslər konkret cinayət əməllərinə görə məsuliyyətə cəlb ediliblər. Sadəcə azərbaycanofob siyasətçinin COP29 kimi nüfuzlu tədbirin keçiriləcəyi ərəfədə qərəzli çıxışlar etməsi beynəlxalq ictimaiyyətdə çaşqınlıq yaratmaq, ölkəmizin imicinə zərbə vurmaq məqsədi güdür. 

Xatırladaq ki, Almaniyanın ictimai kanalı ARD-də Azərbaycan əleyhinə bədii filmin ("Am Abgrund") hazırlanmasında da ermənipərəst Şvabe yaxından iştirak edib. 

Faktdır ki, bu "demokratik" siyasətçi onilliklər boyu Ermənistanın Azərbaycan ərazilərini işğal altında saxlamasından, talamasından, maddi-mədəni irsimizi məhv etməsindən bir dəfə də olsun bəhs etməyib. 1 milyondan çox azərbaycanlının qaçqın və məcburi köçkün vəziyyətinə düşməsi, çadırlarda, vaqonlarda, yataqxanalarda acınacaqlı vəziyyətdə yaşaması heç zaman "insan haqları keşikçisi" Şvabenin diqqətini çəkməyib.  

Ancaq erməni lobbisinin təsiri altında olan Şvabe Qarabağ ermənilərinin hüquqları barədə bütün tribunalardan danışmağı özünün "mənəvi" borcu (əslində, bunu rüşvət müqabilində etdiyi açıq şəkildə ortadadır) sayır. Halbuki Qarabağın keçmiş erməni sakinləri azərbaycanlılar kimi nə etnik təmizləməyə, nə də hər hansı bir zorakılığa məruz qalıblar. Onlar könüllü şəkildə və tam təhlükəsiz şəraitdə ölkəmizi tərk ediblər.  

Antiazərbaycançı şəbəkə iflasa məhkumdur 

Gətirilən nümunələrdən də aydın olur ki, AŞPA üzvü F.Şvabe erməni lobbisinin maraqlarına xidmət edən qərəzli şəxs kimi antiazərbaycançı şəbəkənin sifarişlərini canla-başla yerinə yetirir. 

Bütün bunların fonunda da görünür ki, hələ də başda ABŞ, Fransa, Almaniya kimi  ölkələr olmaqla bölgədə maraqları olan riyakar Qərb təsisatları Azərbaycanın BMT TŞ-nin 4 qətnaməsini öz gücü ilə yerinə yetirərək torpaqlarının işğalına son qoymasını, suverenliyini bərpa etməsini həzm edə bilmirlər. Hazırda dözülməz irqçilik, azərbaycanofobiya və islamofobiyanın tüğyan etdiyi AŞPA isə ölkəmizə qarşı təşkilatlanmış şəbəkənin bir növ yuvası rolunu oynayır. Çalışılır ki, bu qurum vasitəsilə Azərbaycana siyasi təzyiqlər edilsin.   

Amma Qərbin apardığı bu qərəzli siyasət ümumilikdə respublikamızın Avropa Şurasını tərketmə ehtimalını qüvvətləndirmiş olur. Çünki müstəqil siyasət yürüdən Azərbaycanla heç kəs diktə dili ilə danışa bilməz və ölkəmiz milli maraqlarını təhdid edən istənilən beynəlxalq gücə öz yerini göstərmək iqtidarındadır.  

Yasəmən MUSAYEVA,

"Azərbaycan"