44 günlük Vətən müharibəsində igidliklə vuruşanlar arasında mənim oğlum Rövşən Vəlixanov da var. 1994-cü il doğumlu Rövşənin Vətənə sonsuz sevgisi vardı. Hərbi xidmət dövründə ara-sıra evə gələndə ordumuzun gündən-günə gücləndiyini böyük fərəhlə söyləyərdi. Həmişə də bu sözü təkrarlayırdı: Ali Baş Komandanımız əmr versə, bir neçə günə işğal olunmuş torpaqlarımızı düşməndən azad etməyə qadirik.

2020-ci il sentyabrın 27-də Vətən müharibəsi başlayanda Azərbaycan Silahlı Qüvvələrinin tərkibində döyüşlərə qatıldı. Murovdağın düşməndən azad olunması uğrunda gedən döyüşlərdə qəhrəmanlıqla iştirak etdi. Lakin oktyabrın 2-də eşitdik ki, Rövşən itkin düşüb. Dekabrın 18-də xəbər gəldi k, şəhid olub. Nəşini gətirib doğulub boya-başa çatdığı Qaraxanlı kənd qəbiristanlığında dəfn etdik.

Amma bu məktubu yazmaqda məqsədim başqadır. Rayonumuzda şəhidlərə və onların ailələrinə xüsusi diqqət və qayğıkeşlik göstərilir. Rayonda elə bir şəhid ailəsi yoxdur ki, bu diqqət və qayğıkeşlikdən kənarda qalsın. Onların adlarının əbədiləşdirilməsi üçün bir çox tədbirlər həyata keçirilir.

Mənim şəhid oğlumun da xatirəsini əbədiləşdirmək üçün adına bulaq kompleksi inşa edilmişdir. Bu yaxınlarda bulaq kompleksinin açılışı oldu. Rayonun bütün ictimaiyyəti açılışa toplaşmışdı. Çıxış edənlər oğlumun necə vətənpərvər olmasından danışdılar və belə bir oğul böyütdüyümüz üçün bizə minnətdarlıq etdilər. Onlar danışdıqca oğlumla qürur duyurdum.

Allah bütün şəhidlərimizə rəhmət eləsin!

Aydın VƏLİXANOV,

Tovuz rayonunun Qaraxanlı kənd sakini, şəhid atası