20 Yanvar 2022 22:07
316
SİYASƏT

Qırğızıstanda 20 Yanvar faciəsinin 32-ci ildönümü qeyd olunub

 

Azərbaycanın Qırğızıstandakı səfirliyində 20 Yanvar faciəsinin 32-ci ildönümünə həsr olunmuş anım mərasimi keçirilib.

AZƏRTAC xəbər verir ki, tədbirdə səfirliyin əməkdaşları, ictimaiyyət nümayəndələri, Azərbaycan diasporunun üzvləri və ölkənin KİV təmsilçiləri iştirak ediblər. İştirakçılar əvvəlcə səfirliyin foyesində 20 Yanvar faciəsini əks etdirən fotostendlərlə və Qarabağ münaqişəsinə dair kitablarla tanış olublar. Onlara 20 Yanvar hadisələri ilə bağlı məlumatlar toplusu təqdim edilib. Tədbir iştirakçıları həmin guşənin qarşısına qərənfillər düzüblər.

Tədbirdə şəhidlərin xatirəsi bir dəqiqəlik sükutla yad edilib, ölkəmizin Qırğızıstandakı səfiri Lətif Qəndilov 20 Yanvar faciəsinin səbəblərini və o zaman hökm sürən ictimai-siyasi vəziyyətlə əlaqədar geniş məlumat verib. Bildirilib ki, ortaya atılmış qondarma Dağlıq Qarabağ problemi Azərbaycanın ərazi bütövlüyünün pozulmasına, torpaqlarımızın işğalına, Ermənistanda və Dağlıq Qarabağda yaşayan yüz minlərlə azərbaycanlının öz doğma yurdlarından qovulmasına yönəlmişdi. Qeyd olunub ki, faciənin səbəbi Ermənistanın əsassız torpaq iddialarına etiraz edən Azərbaycan xalqını cəzalandırmaq idi. Lakin yüzlərlə mülki şəxsin öldürülməsi, yaralanması və həbs olunması xalqımızı qorxutmadı, əksinə, daha da sıx birləşdirdi. Azərbaycan xalqı azadlıq və müstəqillik uğrunda sonacan mübarizə aparmağa qərar verdi. Bütün xalq anlayırdı ki, azadlığa və ərazi bütövlüyünə gedən yol yalnız müstəqillikdən keçir. Ulu öndər Heydər Əliyevin milli dövlət strategiyası və bu xəttin Azərbaycan Prezidenti İlham Əliyev tərəfindən uğurla davam etdirilməsi nəticəsində dövlətimiz və xalqımız müstəqilliyini qoruyub saxlaya bilib. Həmin strategiya 8 Noyabr – Zəfər Günü ölkəmizin ərazi bütövlüyünün təmin olunması ilə məntiqi nəticəsini tapıb.

L.Qəndilov bildirib ki, Ulu Öndər özünün və ailəsinin həyatını təhlükədə qoyaraq 20 Yanvar faciəsindən dərhal sonra Azərbaycanın Moskva şəhərindəki daimi nümayəndəliyinə gələrək qətliamı törədənləri qətiyyətlə ifşa edib, faciəyə siyasi qiymət verilməsini və cinayətkarların cəzalandırılmasını tələb edib. Vurğulanıb ki, o zaman 20 yanvar hadisələri barədə həqiqətləri dünya Heydər Əliyevin dilindən eşidib.

Səfir qeyd edib ki, 1990-cı il yanvar ayının 19-dan 20-nə keçən gecə Azərbaycanın müasir tarixinə ən faciəli günlərdən biri, eyni zamanda, xalqımızın qəhrəmanlıq səhifəsi kimi daxil olub.

Bişkekdəki “Azəri” Azərbaycan Mədəniyyət Mərkəzinin sədri, Qırğızıstanın Əməkdar hüquqşünası Əzizağa Əliyev və diasporun üzvləri 20 Yanvar hadisələri ilə bağlı acı xatirələrini bölüşüblər, diasporun hər zaman Azərbaycan Prezidenti İlham Əliyevin siyasi kursunu dəstəklədiyini ifadə ediblər.

Paytaxtdakı “Türkel” Media Qrupunun baş redaktoru Ramiz Məşədihəsənli xatırladıb ki, 1990-cı il yanvarın 19-da “Alfa” qrupu tərəfindən Azərbaycan televiziyasının enerji bloku partladılıb, Azərbaycan vətəndaşları informasiya almaqdan məhrum edilib.

20 Yanvar faciəsinin 32-ci ildönümü ilə bağlı Azərbaycan Xarici İşlər Nazirliyinin, Ombudsmanın bəyanatları, o cümlədən səfirliyin bununla bağlı məlumatlar toplusu Qırğızıstan Xarici İşlər Nazirliyinə, bu ölkədə akkreditə olunmuş diplomatik missiyalara və beynəlxalq nümayəndəliklərə, eləcə də yerli kütləvi informasiya vasitələrinə gönrərilib.

Səfir iştirakçılara və çıxış edənlərə təşəkkürünü bildirib və şəhidlərin xatirəsinin xalqımızın yaddaşında daim yaşayacağını deyib.

Tədbirin sonunda 20 Yanvar hadisələrinə həsr edilmiş film göstərilib.

Qeyd edək ki, Azərbaycan Xarici İşlər Nazirliyinin bəyanatı və səfirliyin hazırladığı material kütləvi informasiya vasitələrində geniş işıqlandırılıb. Eyni zamanda, keçirilən tədbir haqqında material Qırğızıstan İctimai Televiziya və Radio Yayım Korporasiyası və “STV” televiziya kanalında nümayiş olunub.

20 Yanvar - Ümumxalq Hüzn Günü ilə əlaqədar səfirliyin bayrağı yarıya qədər endirilib. Bu gün Bakı vaxtı ilə saat 12.00-da səfirlik əməkdaşları şəhidlərin xatirəsini bir dəqiqəlik sükutla yad ediblər.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video