Təxminən 10-15 il əvvəl kəndimizə içməli su verildi. Kəndimizi ikiyə bölüb üzü cənuba doğru axan Akkuşa çayının sahilində xarici ölkədən gətirilmiş sudurulducu qurğu quruldu. Buradan isə kəndin ayrı-ayrı yerlərinə yeraltı polietilen borularla xətlər çəkildi, bulaqlar tikildi. 
Mənbəyini Kür çayından götürən Akkuşa çayının boz-bulanıq suyu tam təmizlənərək həmin bulaqlara ötürülürdü. Əhali ekoloji cəhətdən təmiz olan bu sudan istifadə edərək dövlətimizə, belə savab işi görənlərə dua edirdi. Axı bu yerlərin sakinləri yüz illər boyu bulanıq sudan istifadə etmişdilər. 
Lakin bəzi səhlənkar və məsuliyyətsiz adamların günahı üzündən biz yenə əvvəlki vəziyyətə düşmüşük. Bulaqlarımız quruyub. Yenə bulanıq sudan istifadə etməli olmuşuq. Yaranan vəziyyətlə əlaqədar dəfələrlə "Azərsu" ASC-nin 3 saylı Regional Su-Kanal İdarəsinin Salyan rayonundakı sahəsinin rəhbərliyinə müraciət etmişik. Cavab veriblər ki, yaranmış vəziyyəti bilirik. Səbəb 48 saylı Lənkəran Yol İstismarı İdarəsinin 2023-cü ilin iyul ayında kəndarası yollarda asfalt çəkilişi zamanı Şorsulu kəndində 11 bulağı və 46 saylı Cəlilabad Yol İstismarı İdarəsinin həmin nümayəndəliyə daxil olan Boranıkənd kəndində 15 bulağa gedən yeraltı boru xətlərini zədələyərək sıradan çıxarmalarıdır. 
Yol çəkmək, asfalt işi görmək savab iş sayılır. Ancaq, necə deyərlər, gərək elə edəsən ki, qaş düzəltdiyin yerdə vurub göz çıxarmayasan. Belə bir yarıtmaz işin nəticəsidir ki, bir ildən çoxdur içməli su üzünə həsrət qalmışıq. Su işçiləri isə deyirlər ki, yol idarələrinə dəfələrlə yazılı və şifahi şəkildə müraciətlər etmişik. Cavabları bu olub ki, gəlib xətləri bərpa edəcəyik. Amma gün keçir, ay dolanır, il dəyişir, ortada heç bir nəticə yoxdur. 

İlyas KƏRİMOV, 
Məhərrəm ABIŞOV,
Salyan rayonu, Şorsulu inzibati ərazi nümayəndəliyinin Boranıkənd kənd sakinləri