"Azərbaycan" qəzetinin 5 iyul 2024-cü il tarixli sayında dərc edilmiş "Quzu əti mərəzi" sərlövhəli məqaləyə münasibət bildirilməsi barədə Kənd Təsərrüfatı Nazirliyinə ünvanlanmış müraciətə baxılmışdır.
Bildiririk ki, qeyd olunan məsələ ilə bağlı Kənd Təsərrüfatı Nazirliyi tərəfindən kütləvi informasiya vasitələrində, sosial şəbəkələrdə mütəmadi olaraq maarifləndirmə işləri aparılır. Maarifləndirmə işlərinin aparılması ölkədə ət və ət məhsullarının istehsalının artırılmasına, ət istehsalında itkilərin qarşısının alınmasına istiqamətlənmiş fəaliyyətə dəstək xarakteri daşımaqla heyvanların aşağı çəkidə kəsilməsi prosesini qismən zəiflədir. 
Bununla yanaşı qeyd etmək lazımdır ki, örüş yerlərinin və yay otlaqlarının azlığı fermerlərin heyvanbəsləmə imkanlarını məhdudlaşdırır və heyvanları aşağı çəkidə kəsimə vermələrinə səbəb olur. Bu problemin qarşısını almağın əsas yollarından biri qapalı şəraitdə bəsləmə üsulunun təşviqidir ki, bu istiqamətdə də nazirlik tərəfindən müvafiq işlər həyata keçirilir.
Heyvanların aşağı çəkidə kəsiminin inzibati yollarla məhdudlaşdırılması ölkədə ət və ət məhsullarının daha da bahalaşmasına gətirib çıxara bilər. Fermerlərin örüş yerləri və yay otlaqlarına çıxış imkanlarının yaxşılaşdırılması, qapalı şəraitdə heyvan yetişdiriciliyinin dövlət tərəfindən dəstəklənməsi ət istehsalını daha da artırmağa, aşağı çəkidə kəsim problemini mərhələli şəkildə aradan qaldırmağa imkan verəcək.

Sarvan CƏFƏROV,
Kənd təsərrüfatı nazirinin müavini