Andriy Yermak cinayət yolu ilə əldə edilmiş aktivlərin yuyulmasında şübhəli bilinir
Ukrayna Ali Antikorrupsiya Məhkəməsi Prezident Aparatının keçmiş rəhbəri Andriy Yermakı 140 milyon qrivna məbləğində girov müqabilində azadlığa çıxmaq imkan ilə həbs edib. Bu barədə Ukrayna mediası məlumat yayıb.
Məlumata görə, o, cinayət yolu ilə əldə edilmiş aktivlərin yuyulmasında şübhəli bilinir.
Məhkəmənin qərarına əsasən, Yermak beynəlxalq və diplomatik pasportlarını təhvil verməlidir. Həmçinin, iş üzrə təqsirləndirilən şəxslərlə, xüsusən də Timur Mindiç və Oleksiy Çernışovla ünsiyyət qurması qadağandır.
Məhkəmənin qərarından sonra Yermak jurnalistlərə bildirib ki, Ukraynada qalır və "mübarizəsini davam etdirəcək".
"Gizlədəcək heç nəyim yoxdur. Düşünürəm ki, müdafiə vəkilim və hüquq komandam apelyasiya şikayəti verəcək. Ədalət və həqiqəti axtarmaq üçün bütün hüquqi vasitələrdən istifadə edəcəyik", - deyə o bildirib.
Onun sözlərinə görə, istintaq və məhkəmə prosesi "təzyiq altında" aparılıb.
Daha əvvəl Ukrayna Milli Antikorrupsiya Bürosu (UMAB) və Xüsusi Antikorrupsiya Prokurorluğu (XAR) cinayətkar fəaliyyət yolu ilə əldə edilmiş 460 milyon qrivnadan (təxminən 10,4 milyon dollar və ya 8,8 milyon avro) çox pulu əhatə edən irimiqyaslı çirkli pulların yuyulması sxemini aşkar etdiklərini bildirmişdilər. Məlumata görə, vəsait Kiyev yaxınlığında dəbdəbəli tikinti layihələrinə yatırılıb.
Məlum olduöu kimi, 2025-ci ilin noyabr ayında Yermakın evində Ukraynanın enerji sektorundakı korrupsiya işi çərçivəsində axtarış aparılıb. Məmur daha sonra istefa verib.
Rizvan CƏFƏROV,
“Azərbaycan”
677jpg_1781134810.jpg)
png_1781467708.png)
