Salyanın qədim və abad kəndlərindən olan bizim Şorsulu kəndi Ələt-Astara magistral şose yolunun kənarında yerləşir. Mənbəyini Kür çayından götürən Akkuşa çayı kəndimizin ortasından keçir. 
Bu iki həyat faktoru kəndimizin iqtisadiyyatını dirçəltmiş, onun mədəni həyatına çox böyük təsir etmişdir. Müstəqillik dövründən etibarən bu dirçəliş daha da irəliləmişdir. İndi kəndimizdə 3 məktəb, 2 tibb məntəqəsi, poçt, idman klubu, pambıq qəbulu məntəqəsi, 2 şadlıq sarayı, 10-dan çox kommersiya şəbəkəsi, restoran, 3 qapı-pəncərə, 3 avtomobil təmiri sexi və s. fəaliyyət göstərir. 
Kəndimizdə hər bir evə internet xətti çəkilmişdir. İşıq, təbii qaz sarıdan heç bir problemimiz yoxdur. Müasir üslubda tikilən fərdi yaşayış evləri kəndimizin hüsnünə yeni gözəllik qatır. 
Ələt-Astara avtomobil yolu (indi ona el arasında "köhnə yol" deyilir) 2022-ci ilin sonlarında yenidən qurulmağa başladı. Əraziyə texnikalar gətirildi, yolçəkənlər yorulmaq bilmədən çalışdılar. Körpülər salındı, suötürücü qurğular tikildi. Yolun torpaq qatı qazılaraq dərinləşdirildi. Oraya iri-iri çay daşları düzüldü. Sonra torpaq, çınqıl işləri həyata keçirildi. Üstündən asfalt qatı çəkildi. Artıq yol istifadəyə verilmək ərəfəsindədir, son tamamlama işləri görülür. 
Kənd əhalisini sevindirən digər bir səbəb isə kəndarası yolların  abadlaşdırılması, hər bir məhəlləyə asfalt yolun çəkilməsidir. İndi  yağış nə qədər yağırsa yağsın, kəndin istənilən məhəlləsinə rahat gedib-gəlmək mümkündür. 
Bütün bunlara görə dövlətimizin başçısı İlham Əliyevə minnətdarıq. 

Rəis ABDULLAYEV,
Salyan rayonunun Şorsulu kənd sakini