Dekabrın 8-də “İƏT Mədəniyyət Festivalı: Bakı Yaradıcı Həftə – 2025” çərçivəsində “İslam ölkələrində mədəniyyət sahəsində texnologiyaların inkişafı” (CulTech) mövzusunda panel sessiya keçirilib.
AZƏRTAC xəbər verir ki, İslam Əməkdaşlıq Təşkilatının Mədəniyyət İşləri Departamentinin direktoru Lhoucine Rhazouinin moderatorluğu ilə keçən paneldə çıxış edən Azərbaycanın mədəniyyət nazirinin müavini Səadət Yusifova ölkəmizin İslam mədəniyyətinə mühüm töhfə verdiyini qeyd edib: “Biz bu gün burada, sadəcə, mədəni irsimizi deyil, eləcə öz cari siyasi-iqtisadi, həm də mədəni tərəfdaşlığımızı qeyd edirik. Əsrlər boyunca estetik musiqi, memarlıq, xalça toxuculuğu, eləcə də incəsənətin müxtəlif istiqamətləri bizi bir-birimizə daha da yaxınlaşdırıb".
Nazir müavini, həmçinin Azərbaycanda gənc istedadların bilik və bacarıqlarını tətbiq etməklə yaradıcı potensialının üzə çıxarılması, mədəni və yaradıcı sənaye sahələrində görülən işlər barədə məlumat verib. Qeyd olunub ki, Azərbaycanın müxtəlif ölkələrlə əməkdaşlığının güclənməsi, icra edilmiş layihələr ölkəmizin yaradıcı məhsul və xidmətlərinin ixracına da töhfə verib.
Türkiyənin Yunus Əmrə İnstitutunun prezidenti Abdurrahman Aliy rəhbərlik etdiyi qurumun fəaliyyətindən bəhs edib. O, bildirib ki, institut mədəniyyətin texnologiya ilə birləşdirilməsi ideyasını uzun müddətdir diqqətlə izləyir.
"Bu gün burada mədəniyyət və texnologiyanın qovşağında yeni bir baxış bucağı təqdim edən CulTech modelinin İslam ölkələrində tətbiq olunma imkanlarını dəyərləndirmək üçün bir araya gəlmişik. Bu tədbirin Bakıda keçirilməsi bizim üçün xüsusi əhəmiyyət daşıyır. Çünki Azərbaycan innovativ rəqəmsal həllərin reallaşdırılması baxımından regionun ən dinamik ölkələrindən biridir.
Mədəniyyət yalnız keçmişimizi deyil, eyni zamanda, gələcəyimizi formalaşdıran ən güclü amillərdən biridir. Bu gün üzərində dayandığımız CulTech yanaşması da məhz buna görə önəm kəsb edir. CulTech mədəni dəyərlərin texnologiya ilə vəhdətdə təqdim olunması, yəni rəqəmsallaşma yolu ilə mədəni istehsalın gücləndirilməsi və mədəni paylaşımın daha geniş kütlələrə çatdırılması deməkdir. İslam ölkələri gənc əhalisi, zəngin mədəni irsi və sürətlə inkişaf edən texnoloji infrastrukturu ilə bu sahədə birlikdə hərəkət etdikdə ortaya çıxacaq təsir həm regional, həm də qlobal miqyasda əhəmiyyətli olacaq", - deyə A.Aliy bildirib.
ICESCO-nun Bakı Regional Ofisinin direktor müavini Məryəm Qafarzadə bu ofisin Qafqaz və Mərkəzi Asiya bölgələrini – Azərbaycan, Özbəkistan, Tacikistan, Qazaxıstan və Qırğızıstanı əhatə etdiyini diqqətə çatdırıb. Qeyd olunub ki, zəngin tarixi və mədəni irsi olan bu beş ölkə üçün Bakı Regional Ofisi əməkdaşlıq və dialoq baxımından dinamik platforma, xüsusilə gənclər, rəqəmsal texnologiyalar və yaradıcı sənayelər sahəsində təcrübə mübadiləsində mühüm mərkəz rolunu oynayır.
Onun sözlərinə görə, Bakıda yaradıcı gənclərin toplandığı “Mədəni və Yaradıcı Sənayelərin İnkişaf Mərkəzi" kimi məkanlar ICESCO üçün nümunəvi təcrübə sayılır və bu modelin Mərkəzi Asiya ölkələrinə də ötürülməsi üçün geniş imkanlar mövcuddur.
İslam Ölkələri üçün Statistik, İqtisadi və Sosial Tədqiqat və Təlim Mərkəzinin Təlim və Texniki Əməkdaşlıq Departamentinin direktoru Atilla Karaman İslam Əməkdaşlıq Təşkilatının demoqrafik miqyasdan 2 milyard insanı təmsil etdiyini, onlardan 1.1 milyard insanın 25 yaşa qədər olduğunu bildirib ki, bu da 51 faiz təşkil edir.
“Gənclərin 27 faizinin müəyyən ehtiyacı var. Həmin gənclər nə təhsildə, nə məşğulluqda, nə də hər hansı təlim prosesində iştirak edir. Əgər həmin 27 faiz gənci hər hansı formada əmək bazarına və ya istehsala cəlb edə bilsək, bu, üzv ölkələrimizin ÜDM-lərinə əhəmiyyətli dəstək verə bilər. Digər mühüm statistika isə üzv ölkələrimiz arasında rəqəmsal bölgü ilə bağlıdır. Təşkilata daxil olan ölkələrə baxdıqda internetdən istifadə səviyyəsinin 99–100 faizə çatdığını görürük. Bəzi üzv ölkələrimizdə isə bu göstərici 20 faizdən aşağıdır. Bu vəziyyət maliyyə çətinlikləri, infrastruktur problemləri və investisiya çatışmazlığı ilə bağlıdır. Belə bir rəqəmsal bölgü üzv ölkələrimizin istedad potensialı arasında fərqləri daha da dərinləşdirir.
Biz həm fiziki, həm də rəqəmsal tədbirləri birləşdirən, İƏT-ə xas bir platforma yaratmalı, hibrid, mədəniyyətlərarası rəqəmsal öyrənmə ekosistemi qurmağı bacarmalıyıq. Qlobal landşaftda süni intellektə doğru gedirik. Bunu nəzərə alaraq mobillik, akademik körpü proqramları təklif edirik. Universitetlər və sənayelər arasında əlaqələr yaradılması vacibdir. Biz unikal yanaşma irəli sürməliyik. Ən yaxşı proqramları yarada, ən bacarıqlı gəncləri seçərək onları digər İƏT ölkələrinə göndərə bilərik. Nəticədə onlar ən yaxşı təcrübələri öyrənərək ölkələrinə qayıda bilərlər".
Özbəkistan Yaradıcılıq Mərkəzinin Baş direktoru Əbdülvəli Heydərov isə təmsil etdiyi ölkədə mədəni texnologiyalar sahəsində görülən işlərdən bəhs edib.
Panel sessiya sual-cavab və müzakirələrlə davam edib.
