Gəncə Şəhər İcra Hakimiyyətinin başçısı Niyazi Bayramovun  sakinlərlə  görüşləri artıq ənənə halına çevrilib. Belə görüşlərdə o, sakinləri narahat edən məsələlərlə yerində tanış olur, müvafiq tədbirlər görür.

Növbəti görüş şəhərin 18 nömrəli tam orta məktəbində keçirilmişdir. Yerli icra orqanlarının,  idarə, müəssisə və təşkilat rəhbərləri, habelə ətraf ərazidə yaşayan sakinlərin iştirakı ilə keçirilən görüşdə qaldırılan bütün məsələlərə həssaslıqla yanaşılmış, sakinlərin arzu və istəklərinin bir çoxu yerindəcə həll edilmişdir.

Müraciətlər arasında işlə təminat, qaz və su sayğaclarının quraşdırılması, ev növbəliyi, şəhərin bir sıra ərazilərində asfalt yol örtüyünün yenilənməsi və digər məsələlər yer almışdır. Sakinlərə məlumat verilmişdir ki, yolların asfaltlanması məsələsi daim nəzarətdədir. Bildirilmişdir ki, Gəncə şəhərində su xətlərinin yenilənməsi məqsədilə "Açıq Kommunal İnfrastruktur Proqramı II" layihəsi icra olunur. Layihə çərçivəsində işlər "Azərsu" ASC-nin sifarişi ilə "Azəraqrartikinti" ASC tərəfindən görülür. Gəncə şəhərinin küçə və prospektlərinin, məhəllə və qəsəbədaxili yollarının asfaltlanması, abadlıq işlərinin görülməsi də sözügedən layihəyə paralel şəkildə aparılır. Belə ki, təkrar qazıntı işlərinin aparılmaması üçün layihənin icra edilmədiyi və ya tam yekunlaşmadığı ərazilərdə asfalt və bərpa işlərinin görülməsi məqsədəuyğun hesab edilmir. Layihə çərçivəsində işlərin tam başa çatdırıldığı küçə və prospektlərdə isə cari il ərzində asfalt işlərinin görülməsi nəzərdə tutulur.

S.ƏLİYEV,

"Azərbaycan"