Qətərdə təşkil olunan futbol üzrə dünya çempionatında qrup mərhələsinin ikinci turunun oyunları davam edir.

AZƏRTAC xəbər verir ki, günün ikinci qarşılaşması H qrupunda Cənubi Koreya və Qana milliləri arasında keçirilib. Görüşdə ilk qolu 24-cü dəqiqədə qanalı futbolçu Məhəmməd Salisu vurub. Matçın 34-cü dəqiqəsində isə Məhəmməd Kudus fərqlənib-2:0. Toparlanan Cənubi Koreya futbolçuları 58-ci dəqiqədə Sun Kyu Ço ilə fərqi minimuma endirib - 1:2. Təzyiqi artıran Asiya təmsilçisi Sun Kyu Ço ilə 61-ci dəqiqədə tarazlığı bərpa edib - 2:2. Lakin Cənubi Koreyanın bundan artığına gücü çatmayıb. 68-ci dəqiqədə fərqlənən Məhəmməd Kudus Qananı yenidən hesabda önə çıxarıb - 3:2. Bu matçda vurulan son qol olub.

Bununla da Qana H qrupunda ilk xalını və qalibiyyətini qazanıb. Cənubi Koreya isə 2 oyuna bir xal toplayaraq sonuncu pillədə qərarlaşıb. Qrupun digər oyunu isə Bakı vaxtı ilə saat 23:00-da oynanılacaq Portuqaliya və Uruqvay milliləri arasında baş tutacaq.

Dünya çempionatı ilk dəfədir Yaxın Şərqdə keçirilir. Qətər yarışa ev sahibliyi edən 18-ci ölkə kimi tarixə düşüb. Bu, həm də 32 komandanın iştirakı ilə baş tutan sonuncu çempionat olacaq. 2026-cı ildə ABŞ, Meksika və Kanadanın birgə təşkil edəcəyi mundialda isə 48 yığma mübarizə aparacaq.

Qətərin ev sahibliyi etdiyi mundial 29 gün davam edəcək. Dünya çempionatında ümumilikdə 64 qarşılaşma keçiriləcək. 32 komanda hərəsində 4 yığma olmaqla səkkiz qrupda mübarizə aparır.

Çempionluq uğrunda mübarizədə əvvəllər qalib olmuş 8 komandadan yeddisi iştirak edir. Braziliya, Almaniya, Argentina, Uruqvay, Fransa, İngiltərə və İspaniya yenə titul qazanmaq arzusundadır. Elə mundialın əsas favoritləri də onlardır. Uruqvay istisna olmaqla, digərləri qızıl medala namizədlər hesab olunur.