Bu günü çox gözləmişdik!

Həsrətlə, yanğı ilə gözləmişdik!

Bəzən ümidimizin itəcəyinə qədər yaxınlaşmışdıq!

Amma nə ümid, nə də inam bizi tərk etdi!

Yaxşı bilirdik ki, erməni öz ağzı ilə hürmür!

Yaxşı bilirdik ki, onun arxasında kimlər dayanır, kimlər onu müdafiə edir, qoruyur.

Yaxşı bilirdik ki, beynəlxalq hüquq da, BMT-nin 4 qətnaməsi də, ATƏT-in Minsk qrupu da mənasız, heç bir nəticəsi olmayacaq "illüziya pərdəsi"dir.

Bilirdik ki, həqiqətdə dünya ikili standartlarla idarə olunur.

Bilirdik ki, ikili standart dünya erməniliyinə, onun puluna xidmət edir!

Bilirdik ki, özümüzdən və Tanrımızdan başqa kimsə bizə kömək etməyəcəkdir!

Bu inamla, bu istəklə Qurtuluşa sığındıq!

Bu inamla, bu istəklə Ulu Öndər Heydər Əliyevə inandıq, arxalandıq!

Bu inamla, bu istəklə İlham Əliyevə güvənərək onun ətrafında "dəmir yumruq" kimi birləşdik!

Tarixinin ən qüdrətli Azərbaycanı yarandı!

Azərbaycanın ən qüdrətli ordusu yarandı!

Xalqın görünməmiş birliyi yarandı!

Torpaqların işğaldan azad edilmə vaxtı çatdı!

Xocalı, Qaradağlı, Başlıbel, Bağanıs Ayrım və digər soyqırımlarının qisasının alınma zamanı çatdı!

Qudurmuş düşmənlə haqq-hesab çəkmə anı çatdı!

İlham Əliyev "İrəli!" əmrini verdi!

İgid əsgərlərimiz, mərd oğullarımız, Vətən uğrunda hər an şəhidliyə hazır olan balalarımız hayqıraraq düşmən üzərinə yeridilər!

"Ya Qarabağ, ya ölüm!" deyənlər Qarabağ uğrunda son savaşa başladılar!

Müzəffər Ali Baş Komandan İlham Əliyevin "Qarabağ Azərbaycandır və nida!" çağırışı əsl Zəfər marşına çevrildi!

Vətənin igid oğulları Vətəni murdar ləpirlilərdən təmizləmək üçün sonsuz qəzəb və nifrətlə düşmən üzərinə yürüdülər.

Hər biri bir aslana çevrilən Azərbaycan əsgəri görünməmiş qəhrəmanlıqlar, fədakarlıqlar, igidliklər göstərdilər!

Müqəddəs Azərbaycan torpağını 30 illik işğaldan azad etmək üçün cəmi 44 gün bəs etdi!

Müzəffər Ali Baş Komandan İlham Əliyevin qüdrətli ordusu düşməni darmadağın etdi, işğalçıları qorxaqlar və fərarilər dəstəsinə çevirdi, bir-birinin ardınca 300-dən çox yaşayış məntəqəsini azad etdi!

Bu döyüşlərin pik nöqtəsi Şuşanın yalın əllə, görünməmiş şücaətlə alınması oldu!

Düşmən Baş Sərkərdəmizin ayaqlarına düşərək yalvarmağa, aman diləməyə başladı!

10 noyabr 2020-ci ildə Müzəffər Ali Baş Komandan İlham Əliyevin bütün şərtlərini əks etdirən üçtərəfli Bəyanat imzalanaraq torpaqlarımız yağı düşməndən azad edildi!

Lakin ermənilər yenə də ikiüzlülüklərindən əl çəkmədilər.

Onlara verilən boş vədlərə inanaraq qisas niyyətinə düşdülər.

Laçın dəhlizini xəyanət yoluna, separatizmi qidalandıran qan damarına çevirdilər.

"Dəmir yumruq" ikinci dəfə işə düşdü!

23 aprel 2023-cü ildə Laçın yolunda, Həkəri körpüsü üzərində sərhəd nəzarət-buraxılış məntəqəsi yaradılaraq Azərbaycanın ərazi bütövlüyü bərpa edildi!

Ermənistan yenə məkrli niyyətindən əl çəkmədi.

"Dəmir yumruğ"un üçüncü zərbəsi 19-20 sentyabrda şimşək kimi çaxdı!

Cəmi 23 saat ərzində Azərbaycanın dövlət suverenliyi və Konstitusiya əsasları da bərpa olundu!

Müzəffər Ali Baş Komandan İlham Əliyev Azərbaycanı qalib xalqa, qalib dövlətə çevirdi!

Müzəffər Ali Baş Komandan İlham Əliyev erməni separatizminə birdəfəlik və əbədi olaraq son qoydu!

Müzəffər Ali Baş Komandan İlham Əliyev "Qarabağ problemi"ni tarixin arxivinə göndərdi!

Dünən cənab İlham Əliyev Azərbaycan Respublikasının bütün ərazisində qanunun aliliyinin təmin olunduğunu və Azərbaycan Respublikasının dövlət suverenliyinin bərpa edildiyini nəzərə alaraq 20 sentyabrın Azərbaycan Respublikasında Dövlət Suverenliyi Günü kimi qeyd olunması barədə Sərəncam imzaladı!

Eşq olsun Müzəffər Ali Baş Komandanımıza!

Suverenlik Günün mübarək, Şanlı Azərbaycanım!

Gözün aydın, qalib xalqım!

Qarabağ Azərbaycandır!

Bəxtiyar SADIQOV