20 Yanvar 2022 00:39
1166
CƏMİYYƏT
A- A+

Cəsur oğullardan biri

 

Vətəni qanı-canı bahasına  qoruyan və yaşadan qeyrətli, igid oğlanlarımız Azərbaycanın ərazi bütövlüyü  uğrunda  od-alovdan  keçərək  şanlı tarix yazdılar.  Bu yolda  ulu torpağın bağrına Zəfər bayrağı  sancıb,  şəhidlik  zirvəsinə ucalan igidlərimiz çox oldu.  Onların xatirəsi  xalqımızın qəlbində əbədi yaşayacaq.

Lerik rayonunun Piran kəndində dünyaya göz açan, Qubadlının azadlığı uğrunda gedən döyüşlərdə düşmənə qarışı haqq savaşımızda  şəhidlik zirvəsinə ucalan 23 yaşlı gizir Vidadi Cəbrayıl oğlu Cabbarovun da adı onların sırasındadır.

Vətən fədaisi Vidadi Cabbarov İkinci Qarabağ müharibəsi başlayan gündən  erməni silahlılarına qarşı haqq savaşında qəhrəmancasına vuruşur, düşmənə layiqli cavab verirdi. O, Azərbaycanın Milli Qəhrəmanı Şükür Həmidovun rabitəçisi idi. Füzulidən başlayan döyüş yolu polkovnik Şükür Həmidovla birlikdə onu Qubadlıya qədər apardı.

Çətin, lakin şərəfli döyüş yolunu, özünün də dediyi kimi, “düşməni əzə-əzə” keçdi.  Təəssüf  ki, onun döyüş yolu da ömrü kimi, qısa oldu. İgid gizir yağının atdığı mərminin qəlpəsindən yaralanaraq şəhidlik zirvəsinə ucaldı. Həmin vaxt onların həyata keçirdiyi əks-hücum əməliyyatı uğurla başa çatdı. Vidadinin şəhidliyindən iki gün sonra komandiri  Şükür Həmidov da şirin canını qurban verməklə şəhadətə qovuşdu.

 Bu günlərdə Lerik rayonunun Piran kəndinin  camaatı Vətənin qəhrəman oğlu Vidadi Cabbarovun  məzarını ziyarət edəndə igid döyüşçülərimizdən böyük qürurla, iftixarla  söz açdılar. Ağsaqqal Oruc Aslanov dedi ki, Vidadi  aramızda olmasa da, onun xoş xatirəsini ürəyimizdə yaşadırıq: “...Çünki o, Vətən, torpaq uğrunda şəhid oldu. Gənc yaşlarında olsa da, Vidadi nəcib, xeyirxah əməllərin sahibi  kimi el-obada yaxşı hörmət qazanmışdı.  Vətənə xidmətinə də sağlam əqidəli, xalqına, dövlətinə  sədaqətli bir vətənpərvər kimi getdi. Məqamı gələndə  Qarabağ torpaqlarının  bir qarışı da düşmən ayaqları altında qalmasın deyə, çəkinmədən sinəsini  Vətəninə sipər etdi.  Belə bir igidlə fəxr etməyə Piran camaatının mənəvi haqqı var. Həm də dövlət tərəfindən layiq görüldüyü “Vətən uğrunda”, Cəbrayılın, Qubadlının azad edilməsinə görə medalları isə yalnız ailəsinə deyil, həm də piranlılara təsəllidir.

 “...Vidadi çox qeyrətli, mərd oğlan idi. Vətənini hər şeydən üstün, qiymətli sayırdı.  Mənfur ermənilərin Qarabağa təcavüzünə heç cür dözə bilmirdi. Odur ki, İkinci Qarabağ müharibəsində Vətəni öz qanı bahasına yaşadan,  igidliyi dillərdə dastana dönən oğullardan biri də Vidadi oldu. Allah rəhmət eləsin, məqamı uca oğula!”

Bu  fikirlər isə kənd sakini Habil Əliyevə məxsusdur. O, igid, qorxmaz, cəsur döyüşçünün uşaqlıqdan vətənpərvər kimi tanındığını da dilə gətirdi.

 Samir Məmmədov isə fikirlərini qürurla səsləndirdi: “Piranlılar həmişə, hər yerdə Vidadinin hünərindən iftixarla danışırlar. 44 günlük Vətən müharibəsində o, qəhrəmanlığı ilə tarix yaradanların sırasında oldu və adını Zəfər salnaməsinə əbədi həkk etdirdi. Olduqca şərəfli bir ömür yaşadı. Düzdür, ömrü qısa oldu. Amma yaşamaq illərləmi ölçülür? 100 il ömür sür, Vətəninə, xalqına, dövlətinə xeyrin dəyməsin, bu, kimə lazımdır ki?! Ölümsüzlüyə qovuşan qəhrəman Vidadi isə keçdiyi həyat yolu ilə Vətəni necə sevməyi, torpağı necə qorumağı gənclərə öyrətdi. İndi onun kimi oğulların adı çəkiləndə ürəyimiz qürurdan dağa dönür. Bütün Azərbaycan belə oğullarla  fəxr edir. Kənddə Vidadinin adına “Xatirə bulağı”nın tikilməsi də məhz onun adının əbədiyyətə qovuşmasından xəbər verir...”

 

Z.ORUCOĞLU,

Lerik rayonu, Bradi kənd sakini

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video