Keçən illərlə müqayisədə əkin suyumuz boldur. Hər bir torpaq mülkiyyətçisi, fermer kanallardan su götürüb əkin sahələrini suvara bilir. Taxılın, yoncalıqların suvarılması, demək olar ki, başa çatmışdır. Vaxtında suvarıldığı üçün zəmilərdən bol məhsul gözlənilir. 
Tel-tel olan taxılın hündürlüyü qurşağa çatır. Aprel ayının sonuna kimi boruya qalxan kollar sünbül bağlayacaq. Yonca sahələri də taxıl kimi ləpələnir. Pambıq əkiləcək sahələrdə isə yaz tarla işləri aparılır. Hər kəs qədərincə su götürərək suvarma işini həyata keçirə bilir. 
Mən özüm bir neçə gündən sonra çiyid səpininə başlayacağam. Bu, keçən ildəkindən təxminən 20 gün tez olacaq. Aydın məsələdir ki, bitki vaxtında əkiləndə məhsul da vaxtında yetişir. Payızda yağışlar düşməmiş pambığı yığıb qurtara bilirsən. Belə olduqda məhsuldarlıq da yüksək olur, itkiyə yol verilmir. 
"Su bolluqdur", - deyiblər. Bu il isə su boldur, həm də əkin üçün çox yararlıdır. Keçən il bu vaxtlar Kür çayı yosunlu halda axırdı, eyni zamanda Mingəçevir su anbarından buraxıldığından dupduru olmaqla yanaşı, bir az da şor idi. 
Bu il təsərrüfat ilidir. Yanvarda bir neçə dəfə qar yağdı, fevralda, martda yağışlar düşdü. Kənd təsərrüfatı da təbiətlə əlaqədardır. Əminəm ki, bu il həm taxıl biçinində, həm də payızda - pambıq yığımında, eləcə də heyvandarlıqda fermerlərin üzü güləcək. 

İmaməddin DADAŞOV,
Neftçala rayonu, Kürqarabucaq kənd sakini, fermer