Azərbaycan çoxmədəniyyətli və çoxmillətli ölkədir. Burada əsrlər boyu ruslar, ukraynalılar, belaruslar, yəhudilər və digər millətlərin nümayəndələri azərbaycanlılarla birlikdə qardaşlıq muhitində yaşayırlar. Bunun bariz nümunəsi bizim Mozqovoylar ailəsidir.
Babam Jakov Mozqovoy bir əsr əvvəl ailəsilə birlikdə Rusiyadan Tərtərin Zolgörən kəndinə köçüb, burada məskunlaşmışdı. Sonralar o, Tərtər şəhərinin özündə ev almış və uzun illər şəhərin yeganə fotoqrafı kimi işləmişdi. Babam öz peşəsini oğlu Viktora öyrətmişdi. Köhnə tərtərlilər atamı həm də ozamankı "Qızıl Bayraq" qəzetinin fotomüxbiri kimi xatırlayırlar. Həmin dövr rayonumuzun kəndlərində və şəhərin özündə onun tərəfindən çəkilmiş yüzlərlə əmək qabaqcılının şəkilləri rayon qəzetinin səhifələrində dərc olunub.
Ailəmiz həmişə azərbaycanlılardan isti və mehriban münasibət görüb. Azərbaycan doğma vətənimizdir. Dünyanın müxtəlif nöqtələrində müharibə ocaqları, dini və milli ayrı-seçkilik alovlandığı bir dövrdə ölkəmizdəki tolerantlıq mühitinin, multikultural dəyərlərin qorunması təqdirəlayiqdir. Bu, Ulu Öndərin layiqli davamçısı, Prezident İlham Əliyevin həyata keçirdiyi siyasətin nəticəsidir. Bu, hamımızın sevimlisi Mehriban xanım Əliyevanın ayrı-ayrı xalqların nümayəndələrinə göstərdiyi humanist münasibətdən irəli gəlir.
Onu da qeyd edim ki, mən və qardaşım Aleksey Azərbaycan Ordusunda müddətli həqiqi hərbi xidmətimizi başa vurduqdan sonra müddətdən artıq hərbi qulluqçu kimi fəaliyyətimizi davam etdirmişik. 44 günlük Vətən müharibəsi başlayanda hər ikimiz ordudaydıq. Döyüş yoldaşlarımızla birlikdə ən qaynar nöqtələrdə vuruşmuşuq. Fəxr edirik ki, torpaqlarımızın işğaldan azad olunmasında bizim də payımız var.
Prezident İlham Əliyevin sərəncamları ilə hər ikimiz "Suqovuşanın azad olunmasına görə" medalı ilə təltif edilmişik. Həmçinin Baş nazir Əli Əsədovun sərəncamı ilə "Vətən müharibəsi iştirakçısı" medalına layiq görülmüşük.
Çıxışlarının birində Prezident İlham Əliyev deyib: "Azərbaycanda yaşayan insanlar, müxtəlif etnik qrupların və dinlərin təmsilçiləri bir ailə kimi yaşayırlar. Onlar Azərbaycanın dəyərli vətəndaşlarıdır, dövlətçiliyimizin əsl vətənpərvər insanlarıdır". 
Öz ailəmizin timsalında deyə bilərəm ki, bu, həqiqətən belədir.
Bizə verdiyi yüksək dəyərə görə, Prezidentimizə təşəkkürümüzü bildiririk.

Andrey MOZQOVOY,
Tərtər şəhəri