Bu günlər Neft İxrac edən Ölkələr Təşkilatına (OPEC) üzv və qeyri-üzv ölkələrin nazirlərinin onlayn formatda 34-cü iclası keçirilib. İclasda  Azərbaycan da  cari ilin oktyabrında qəbul edilmiş qərarın qüvvədə saxlanılmasına razılıq verib.
Energetika Nazirliyindən verilən  məlumatda bildirilir ki, beləliklə, "Əməkdaşlıq Bəyannaməsi"nin iştirakçı ölkələrinin cari ilin avqust ayındakı kvotalarına nəzərən müəyyənləşdirilmiş öhdəlikləri sabit saxlanılır: "Azərbaycanın da ixtisarlarla bağlı öhdəliyi gündəlik 33 min barel, gündəlik xam neft hasilatı üzrə kvotası isə 684 min barel həcmində olmaqla dəyişməz qalır".
Dünya enerji bazarında  özünü etibarlı tərəfdaş kimi təsdiqləmiş Azərbaycanın  "OPEC+" formatındakı  təşəbbüsləri də daim  yüksək qiymətləndirilir. Belə ki,  ölkəmiz "OPEC+"un fəal üzvlərindəndir. Prezident İlham Əliyev bunu  2020-ci ilin fevralında  56-cı Münhen Təhlükəsizlik Konfransında da xatırladaraq demişdir: "Onların görüşlərindən biri bizim dəvətimizlə Bakıda keçirilib. Həmçinin 2016-cı ildə Davosda "Neftin qiyməti ilə bağlı nə etmək olar?" sualı veriləndə mən dedim, yaxşı olar ki, əsas qeyri-OPEC ölkələri və OPEC ölkələri bir araya gələrək razılaşsınlar. Mən şadam ki, bu, baş verdi. Düşünürəm ki, bu, davam etməlidir. Xüsusilə indi bu koronavirus vəziyyəti ilə bağlı, - cənab Birol çox maraqlı məlumat verdi, - neft istehsal edən ölkələrdə bütün çətinliklərə baxmayaraq, neftin qiymətinin nəyə görə aşağı olması və bundan da aşağı səviyyəyə düşə bilməsini nəzərə alaraq düşünürəm ki, "OPEC+" əməkdaşlığının davam etdirilməsi çox vacibdir. Çünki bu gün bizdə vəziyyət elədir ki, OPEC və qeyri-OPEC ölkələri bir təşkilatda fəaliyyət göstərir. Bizim bundan başqa belə təşkilatımız və əməkdaşlığımız yoxdur. Bəzən bir təşkilat daxilində razılığa gələ bilmirlər. Bizdə isə bu nadir format var və biz bunu əldən buraxmamalıyıq".
Xatırladaq ki, OPEC - Neft İxrac edən Ölkələr Birliyidir. Bu təşkilat neft ixrac edən ölkələr tərəfindən neftin qiymətinin tənzimlənməsi məqsədilə yaradılıb. Onun üzvləri iqtisadiyyatı əsasən neftdən asılı olan dövlətlərdir. 1960-cı il sentyabr ayında Bağdadda keçirilən konfransda yaradılan OPEC qeyri-hökumət təşkilatı kimi daimi fəaliyyət göstərir.
Yeri gəlmişkən, OPEC-in 60 illiyinə həsr olunmuş xüsusi bülletendə Azərbaycanın Energetika naziri Pərviz Şahbazovun  da qeydləri  dərc olunmuşdu. Məqalədə  birlik, həmrəylik və əməkdaşlığın OPEC-in 60 illik fəaliyyətində bütün məram və məqsədlərinin zirvəsini təşkil etdiyi, OPEC ideyasının reallığa çevrilməsinin neft ölkələri arasında əməkdaşlığa inamın nəticəsi olduğu  vurğulanmışdı. Eləcə də  Azərbaycanın "OPEC+" formatı çərçivəsində təşkilatla əməkdaşlığından  bəhs olunmuşdu. Həmçinin qeyd edilmişdi ki,  hazırkı çətin sınaqlar dövründə OPEC və qeyri-OPEC ölkələrinin əməkdaşlığı və həmrəyliyi təşkilata ən gözəl yubiley hədiyyəsidir.
Bu il avqustun 1-dən etibarən OPEK-in  baş katibi vəzifəsini Haysam əl-Qays icra etməyə başlayıb. O, bu vəzifəyə OPEK-in 2022-ci il yanvarın 3-ü keçirilmiş xüsusi iclasında üç il müddətinə təyin olunub. 
Onu da qeyd edək ki, "OPEC+" ölkələri nazirlərinin növbəti görüşünün gələn il iyunun 4-də keçirilməsi razılaşdırılıb.

Flora SADIQLI, 
"Azərbaycan"