Azərbaycan Milli Elmlər Akademiyasının (AMEA) Lənkəran Regional Elmi Mərkəzi 2022-ci ildəki elmi və elmi-təşkilati fəaliyyəti haqqında hesabat verib.

AZƏRTAC-ın bölgə müxbiri xəbər verir ki, əvvəlcə tədbir iştirakçıları Ümummilli Lider Heydər Əliyevin abidəsini ziyarət edib və önünə gül dəstələri düzüblər.

Tədbiri giriş sözü ilə açan AMEA-nın prezidenti akademik İsa Həbibbəyli bildirib ki, akademiyanın tarixində ilk dəfə olaraq illik elmi hesabat regionun özündə dinlənilir, həmçinin Lənkəran Regional Elmi Mərkəzində Folklor-etnoqrafiya arxeologiya şöbəsinin adı dəyişdirilərək Tarix və ədəbiyyat şöbəsi, Lənkəran Regional Elmi Mərkəzində kitabxananın yaradılmasına qərar verilib.

Daha sonra hesabat məruzəsi ilə çıxış edən mərkəzin direktoru aqrar elmləri doktoru Fərman Quliyev bildirib ki, 2022-ci ildə Lənkəran Regional Elmi Mərkəzinin əməkdaşları elmi fəaliyyətlərini 3 problem əsasında aparıblar. Bu problemlərə dair icra olunan 7 mövzudan 4-ü fundamental və 3-ü tətbiqi əhəmiyyətli işlərdir.

Lənkəran Regional Elmi Mərkəzinin əməkdaşları 2022-ci ildə elmi-tədqiqat işlərini çay, sitrus və subtropik bitkilərin mövcud sort və formalarının toplanmasına, morfoloji bioloji təsərrüfat xüsusiyyətlərinə, onların məhv olmaq təhlükəsindən qorunmasına, bərpa edilməsinə, bölgənin floristik tərkibinin öyrənilməsinə və müxtəlifliyin qiymətləndirilməsinə həsr ediblər. Əməkdaşlar, həmçinin nadir bitkilərin bioekoloji və fitosenotik xüsusiyyətləri, Cənub bölgəsində ekoloji və genetik faktorlar, tibbi nəzarətin uzunömürlülük fenomeninə təsirinin öyrənilməsi, Azərbaycanın Cənub-Şərq regionunun folklor, etnoqrafik, arxeoloji və numizmatik abidələrin aşkarlanması və s. barədə tədqiqat aparıblar. Hesabat ilində Lənkəran Regional Elmi Mərkəzinin elmi-tədqiqat planına müvafiq olaraq əməkdaşlar tərəfindən yerinə yetirilən 2 iş başa çatdırılıb.

Hesabat ilində yeni çay forma-klonları (FAQ-12; 13; 15; 16; 17; 18; 19; 20; 21; 22) üzərində tədqiqat aparılıb, onların müqayisəli aqrobioloji, biomorfoloji və təsərrüfat qiymətləri verilib. Bundan əlavə, Lənkəran Regional Elmi Mərkəzinin təcrübə bazasında toplanmış və introduksiya olunmuş limon sort-formalarının yerli şəraitə adaptasiya xüsusiyyətləri müəyyənləşdirilib.

Mərkəzin təcrübə bazasındakı naringi sortlarının yerli şəraitə adaptasiya olunması xüsusiyyətləri müəyyənləşdirilib, biomorfoloji və təsərrüfat göstəriciləri qiymətləndirilib.

Məruzə dinlənildikdən sonra müzakirə olunub, suallar cavablandırılıb, bir sıra təkliflər səsləndirilib.