Yanvarın 17-də, Martin Lüter Kinq günündə Kinqin qohumları və onların tərəfdarları Vaşinqtonda yürüş keçirərək Senatdakı demokratları müxalifət mövqeyi tutan respublikaçılara və bəzi demokratlara üstün gələrək seçki hüquqlarına milli səviyyədə yenidən baxılmasına nail olmağa çağırıblar.

AZƏRTAC xəbər verir ki, yürüş iştirakçıları Martin Lüter Kinqin anadan olmasının 93-cü ildönümünə həsr edilmiş milli bayrama toplaşıblar. Mülki hüquqlar uğrunda hərəkatın liderləri artıq neçə ildir ki, seçki hüquqları barədə qanuna dəyişikliklər olunmasını tələb edirlər. Çoxları belə hesab edir ki, ABŞ-ın qaradərili vətəndaşlarının çoxu seçkilər zamanı səsvermə hüquqlarından istifadə edə bilmir. Ştatların hakimiyyət orqanları yetərli sayda seçki məntəqələri yaratmır və ya poçt vasitəsilə vaxtından əvvəl səsvermə qaydalarını sadələşdirmirlər.

Martin Lüter Kinqin oğlu III Martin Lüter Kinq, onun həyat yoldaşı Arndrea Uoters Kinq və onların qızı İolanda Rene Kinq bir neçə yüz nəfərdən ibarət fəallara qoşularaq Frederik Duqlas Memorial körpüsündə yürüş keçiriblər. Bu yürüş yaxın vaxtlarda Konqres tərəfindən bəyənilmiş, dəyəri 1,2 trilyon dollar olan infrastrukturun bərpasına dair qanun layihəsinin rəmzidir.

Prezident Co Bayden xalqa videomüraciətində bəyan edib ki, amerikalılar Martin Lüter Kinqin yarımçıq qalmış işini davam etdirməli, hər kəs üçün iş yerlərinin əlçatan olmasını, ədaləti təmin etməli, “bütün başqa hüquqların müqəddəs əsası olan səsvermə hüququnu” müdafiə etməlidirlər. Bayden deyib: “Amerikada seçkili vəzifə tutan hər bir şəxs səsvermə hüququ barədə öz mövqeyinə aydınlıq gətirməlidir”.

Senatda çoxluğun lideri Çak Şumer artıq çərşənbə axşamı günü yeni qanun layihəsinə dair səsverməyə keçirməyə çağırıb. Bu qanun noyabrın əvvəlində keçiriləcək rəsmi seçkilərə qədər poçt vasitəsilə səsvermə imkanını genişləndirəcək, tarixən irqi ayrı-seçkilik müşahidə olunan ştatlarda seçkilərə federal nəzarəti gücləndirəcək, seçki kampaniyalarının maliyyələşdirilməsi qaydalarını sərtləşdirəcək.