Mütəxəssislər xəbərdarlıq edirlər ki, paltar, qab yumaq üçün istifadə olunan təmizlik vasitələri dəriyə təmas etdikdə onun yağını alır, qurumasına və çatlamasına, həssas şəxslərdə dermatitlərin yaranmasına səbəb olur. Paltarlardan və qablardan yuyucu vasitələri təmizləmək üçün bol miqdarda su ilə durulamaq lazımdır. Yaxşı durulanmamış paltarlar dəridə allergik reaksiyalar, aşınma yaradır.

Ev təmizliyində istifadə edilən yuyucu vasitələr mikroblara nə qədər zərər verirsə, ağciyər, qaraciyər və beyinə də eyni şəkildə təsir göstərir, həmçinin göbələyə yol açır. Bu vasitələr bağırsaq xərçənginə və ağır ağciyər xəstəliklərinin yaranmasına da səbəb olur.

Qabyuyan maşın üçün istifadə edilən yuyucu vasitə də neft məhsuludur və xərçəngə səbəb ola bilər. Nə qədər yuyulsa da, qatqılardan tam təmizlənmir. Sağlamlığınıza zərər vurmaması üçün yuyucu vasitələrlə yuduğunuz qabları daha sonra sirkə və ya limonlu su ilə silin.

Kimyəvi qatqılarla hazırlanmış yuyucu məhsulların insanlara zərər vurduğu ən təhlükəli mənbə xalça hesab olunur. Xalça bütün kimyəvi maddələri özünə çəkir. Buna görə onların təmizliyinə xüsusi diqqət etmək lazımdır.

Yuyucu vasitələrlə bağlı danışan həkim-kosmetoloq Günay Mikayılova deyir ki, qabyuyan və paltaryuyan vasitələrin hamısının dəriyə mənfi təsiri var. Bu yuyucu vasitələrin tərkibi kimyəvi maddələrdən ibarətdir və onların məqsədi də paltarda, yaxud qablarda kirliliyi təmizləməkdir. Kirliliyi təmizləmək üçün həmin kimyəvi maddələrdə ya turşuları, ya qələviləri həll edirlər ki, bu da dəriyə zərərdir. Dəridə lipid təbəqəni parçalayır, allergik reaksiyaların yaranmasına səbəb olur. Ona görə də bu vasitələrdən istifadə edərkən qoruyucu əlcək taxılması məsləhətdir. Qoruyucu əlcəyin altından əllərə nəmləndirici, yaxud yağlı kremlər sürtmək lazımdır.

Həkim bildirir ki, artıq problem baş veribsə, əllər qaşınır, əgər səpirsə, bunu qətiyyən ev şəraitində müalicə etmək olmaz. Mütləq həkimə müraciət etmək lazımdır.

Yasəmən MUSAYEVA,

“Azərbaycan”