“Azərbaycan” qəzetinin 12 sentyabr 2021-ci il tarixli sayında dərc edilmiş “Quru ağac yaşıllıq yox, təhlükədir” sərlövhəli oxucu məktubunda qaldırılmış problem artıq öz həllini tapıb.

Məlumat üçün bildiririk ki, Sumqayıt şəhərində yaşıllaşdırma işləri əsas prioritet istiqamətlərdən birini təşkil edir. Son illərdə şəhər ərazisində yüz minlərlə ağac əkilib, geniş yaşıllıq zolaqları salınıb. Yeni salınan parklarla yanaşı, məhəllə-daxili ərazilərdə də yaşıllaşdırma işlərinə xüsusi diqqət yetirilir. Bununla yanaşı, şəhər ərazisində mövcud olan quru ağacların müəyyənləşdirilərək götürülməsi üçün də davamlı olaraq tədbirlər həyata keçirilir. Müəyyən edilmiş quru ağacların budanması və ərazidən götürülməsi ilə bağlı Ekologiya və Təbii Sərvətlər Nazirliyinə müraciət olunur və bu müraciət əsasında verilmiş rəylərə uyğun olaraq tədbirlər görülür.

“Azərbaycan” qəzetinin 12 sentyabr 2021-ci il tarixli sayında dərc edilmiş “Quru ağac yaşıllıq yox, təhlükədir” sərlövhəli oxucu məktubunda qeyd olunmuş 8-ci mikrorayon 9/25 saylı yaşayış binasının qarşısındakı quru ağacla bağlı problemin aradan qaldırılması üçün tədbirlər görülmüşdür. Qeyd edək ki, ayın əvvəlində hazırlanmış tədbirlər planında 8-ci mikrorayon 9/25 saylı yaşayış binasının qarşısındakı quru ağacın götürülməsi də öz əksini tapmışdır. Sumqayıt Şəhər Yaşıllaşdırma İdarəsi tərəfindən hazırlanmış tədbirlər planına uyğun olaraq qeyd olunan binanın qarşısında və yan tərəfindəki iki quru ağac artıq kəsilərək götürülmüşdür.

Gündüz ƏLİYEV,

Sumqayıt Şəhər İcra Hakimiyyətinin şöbə müdiri