14 Yanvar 2022 17:17
220
Mədəniyyət

Prezident Kitabxanasında “Azərbaycan-Türkiyə əlaqələri” adlı elektron resurs istifadəyə verilib

 

Azərbaycan Respublikası Prezidentinin İşlər İdarəsinin Prezident Kitabxanasının əməkdaşlarının hazırladıqları “Azərbaycan-Türkiyə əlaqələri” adlı elektron resurs iki qardaş ölkə arasında diplomatik əlaqələrin qurulmasının 30 illiyinə həsr edilib. 1991-ci ildə Azərbaycan yenidən öz dövlət müstəqilliyinə qovuşduqdan sonra onu ilk tanıyan dövlət Türkiyə Cümhuriyyəti olmuşdur. 1992-ci il yanvarın 14-dən etibarən qurulan diplomatik əlaqələr hər iki ölkənin xalqlarının bir-birinə daha sıx bağlanmasına və dövlətlərin güclərini birləşdirilməsinə xidmət edib.

İki dövlət arasında münasibətlərin yüksək səviyyəyə çatdırılması ümummilli lider Heydər Əliyevin hakimiyyəti dövründə mümkün olmuşdur. Münasibətlərin “Bir millət, iki dövlət” prinsipi əsasında qurulması hər iki dövlətə qarşılıqlı fayda gətirmiş, birgə nəqliyyat və enerji layihələri həyata keçirilmişdir.

Bütün beynəlxalq platformalarda Azərbaycanla Türkiyə ortaq maraqlardan çıxış edərək bir-birlərini dəstəkləmişlər. Tərəflərdən birinə qarşı edilən ədalətsizliyə qarşı birgə mübarizə aparmışlar. Ermənistanın Azərbaycan ərazilərini işğalına qarşı mübarizədə Türkiyə hər zaman dövlətimizin yanında olmuş və təcavüzkara qarşı sanksiya tətbiq etmişdir.

2020-ci ilin payızında Azərbaycanın işğal alında olan torpaqlarının azad edilməsi uğrunda həyata keçirdiyi 44 günlük hərbi əməliyyatlar zamanı Türkiyənin göstərdiyi mənəvi-siyasi dəstəyin müstəsna əhəmiyyəti oldu.

Bu gün Azərbaycan Türkiyəyə ən çox sərmayə yatıran dövlətlər arasında ikinci yerdədir.

Prezident Kitabxanasının əməkdaşlarının hazırladıqları 5 fəsildən və 13 alt bölmədən ibarət “Azərbaycan-Türkiyə əlaqələri” elektron resursu iki qardaş ölkə arasında münasibətlərin real mənzərəsini özündə əks etdirir.

Prezident Kitabxanasından AZƏRTAC-a bildirilib ki, elektron resursun “Tarixi arayış” bölməsində Türkiyə Cümhuriyyəti ilə Azərbaycan Respublikası arşında münasibətlər təhlil edilib və bu münasibətlərin dinamik inkişafını özündə əks etdirən “Xronologiya” tərtib olunub.

Elektron resursun “Sənədlər” fəslində Azərbaycanla Türkiyə arasında xarici siyasətlə bağlı imzalanan 400-ə yaxın sənədin – saziş, müqavilə, memorandum, protokol, razılaşma, bəyannamə və sərəncamın tam mətnləri istifadəçilərə təqdim edilir.

“E-resurslar” fəslində Azərbaycan-Türkiyə münasibətlərinə dair müxtəlif dillərdə 50-ə yaxın kitabın, 200-ə yaxın seçmə məqalənin elektron versiyaları öz əksini tapır. Bu resursda həmçinin 100-dən çox kitabın, 1400-ə yaxın məqalənin və 35 avtoreferatın biblioqrafiyası toplanılıb.

“Fotoqalereya” bölməsi iki qardaş ölkənin son 30 ildə keçdiyi tarixi yolun fotoxronikasını özündə əks etdirir.

“Azərbaycan-Türkiyə əlaqələri” elektron resursu https://azerturk.preslib.az/  subdomenində yerləşdirilib və müntəzəm olaraq yenilənilir.

Kitabxanada “Azərbaycan-Türkiyə. Bir millət, iki dövlət” adlı kitab sərgisi də oxuculara təqdim edilir.

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video