27 May 2022 03:27
415
Mədəniyyət

Paris Bakının yanında şəhər deyilmiş 

 

Bəzən yorulursan və ruhunun dincəlməsi üçün fərqli bir dünyaya ehtiyacın olur. Fərq eləmir ki, uşaqsan, ya böyük, gəncsən, ya qoca. Sadəcə, həyatın vərdiş etdiyin yeknəsəq  axarından qopub ayrılaraq başqa, ecazkar aləmə qovuşmağa can atırsan. Sizə bəlkə də qəribə gələcək, düşünəcəksiniz ki, belə məkanlara ya nağıllarda, ya da rəngli yuxularda səyahət etmək mümkündür.

Amma tələsməyin, dediklərim əfsanə kimi gəlsə də, reallıqlarla bağlıdır. Artıq dördüncü ildir ki, "Sahil" metrosunun yaxınlığında  nağıl dünyasının rəmzi sayıla biləcək Bakı Kitab Mərkəzi fəaliyyət göstərir. Üzeyir bəy Hacıbəyli və Qoqol küçələrinin kəsişməsindəki binada yerləşən bu mərkəzin sahəsi təxminən 2500 kvadratmetrdir. 

Heydər Əliyev Fondunun təşəbbüsü və dəstəyi ilə yaradılmış bu mərkəzdə kitab satışına tamamilə fərqli bir konsepsiya ilə yanaşılmışdır. Bakı Kitab Mərkəzində Azərbaycan, rus, türk, ingilis, fransız, alman, ərəb və digər dillərdə istənilən janrlarda kitablar təqdim olunur. Burada gəzdikcə həqiqətən də bu vaxta qədər görmədiyin nağıla bənzəyən kitab aləminə qovuşduğunu hiss edirsən. Sanki sevdiyin əsərlərin qəhrəmanları da uzaq keçmişdə yox, sənin yanında,  bircə addımlığındadırlar.

Kitab Mərkəzinin 1-ci və 2-ci mərtəbələrində Heydər Əliyev Fondunun nəşrləri öz yerini tapmışdır. Burada ziyarətçilərə, həmçinin "I love Baku" brendinin rəngarəng suvenirləri və "Azərmarka" şirkətinin məhsulları təqdim olunur. Həm də ürəyin istəyən, ruhunla uzlaşan əsərləri alıb oxuya bilərsən. Mərkəz elə düşünülüb, ele dizayn edilib ki, uşaqlar da, gənclər də, hətta yaşlı adamlar belə burada öz dünyalarına uygun əfsanəvi mühit qura bilirlər. Ürəyin istəyirsə, uzaq keçmişi xatırladan nalçaları altına at, nəvələrini də yığ başına, birlikdə kitab oxuyun. Ya da çıx pəncərəyə, altına döşəkçə at, kürəyini balışa söykə və oxuduğun kitabdakı  qəhrəmanlarla səyahətə çıx.

Birinci mərtəbədə səni dadlı kofe, ikinci mərtəbədəki oxu zalında isə nadir kitablar gözləyir. Burada hər kəsin yaşına uyğun oxu zalları qurulub və hətta zəif görmə qabiliyyəti olanların da, alimlərin də fərqli guşələri mövcuddur. 

O da sirr deyil ki, Azərbaycan oxucuların azlığına görə seçilən ölkələrdəndir, yəni bizdə kitab oxuyan, mütaliə edən azdır. Bakı Kitab Mərkəzinin əsas məqsədi mütaliəyə marağı artırmaq, yeni bir dünyanın qapılarını ziyarətçilərin üzünə açmaqdır.

Burada görüşüb söhbət etdiyimiz adamlardan biri - Müslüm kişi danışır ki, 3 yaşından 9 yaşınadək 5 nəvəsi var: "Bura hamımızın sevdiyi yerdir. Gəlirik, kitabları  seçirik, oxumağı bilənlər bilməyənlər üçün oxuyur". Onun balaca nəvəsindən soruşuram ki, burada xoşuna gələn nədir?  Bir əlini yerə, o birisini göyə sarı uzadıb heyrətini gizlətmir: "Yerdən göyə kimi hər yan kitabdır!"

Ellada xanım deyir ki, burada saatlarla oturub sevdiyi əsərləri oxuyur, Bakı Kitab Mərkəzi gözəl düşünülmüş uğurlu layihədir.

Neçə vaxtdır ki, nəvəmlə "Balaca şahzədə"ni oxuyub qurtara bilmirik. Mən oxumağa başlayan kimi hay-küy salır ki, dayan, düz oxumursan və dalını özü qoşur.  İndi fikirləşirəm ki, birlikdə gəlsək, burada sakit duracaq, ona görə ki, heç bir uşağın burada səsi belə çıxmır. Fransaya sətirlərin qanadında səfərimiz baş tutacaq.

 Bakı Kitab Mərkəzini tərk edəndə soruşuram ki, iş vaxtı saat neçədə bitir? Cavab verdilər ki, axşam saat 10-na kimi.  Gülümsəyirəm, bir əhvalat yadıma düşür.

Tələbəlik illərində kursumuzun rəhbəri İvan İvanoviç Safonov Fransaya getmişdi. O vaxtı kapitalist dünyasına səyahət edən az olurdu. O qayıdandan sonra doluşduq otağına ki, İvan İvanoviç, Paris sizi heyran qoydumu? Çünki Lomonosov Universitetində Parisin necə şəhər olduğunu  hamımız yaxşı bilirdik.

Amma Safonov bizi sakit, fikirli və bir qədər də ciddi qarşıladı:

- Uşaqlar, mən deyim, siz də heç zaman unutmayın, Paris ümumiyyətlə, şəhər deyilmiş!!!

Təəccübləndik və heyrətlə soruşduq ki, niyə, İvan İvanoviç? 

Safonov qanıqara cavab verdi: "Təsəvvür edirsinizmi Fransanın paytaxtında kitabxanalar saat 6-ya kimi işləyir! O şəhərdə ki, saat 6-da kitabxanalar bağlanır, ora şəhər deyil!

İndi bizim kursun rəhbərinin təbirincə desək, kitabxanaları saat 6-da bağlanan Paris doğrudan da kitabxanası axşam saat 10-a kimi işləyən Bakının yanında şəhər deyil.

 

Bahadur İMANQULİYEV,

"Azərbaycan"

Digər Xəbərlər

QƏZETİN ÇAP VERSİYASI

XƏBƏR LENTİ Bütün xəbərlər

DİQQƏT ÇƏKƏNLƏR

ÇOX OXUNANLAR

OXUCU MƏKTUBLARI

NƏŞRLƏRİMİZ

BAŞ REDAKTORDAN

Hamımızın Azərbaycan adlı bir Vətəni var! Qoynunda dünyaya göz açdığımız, minbir nemətindən dadıb isti qucağında boya-başa çatdığımız bu əvəzolunmaz diyar azərbaycanlı adını qürur və iftixarla daşıyan hər kəs üçün müqəddəs və ülvidir.
Müzəffər Ali Baş Komandan İlham Əliyevin rəhbərliyi ilə Azərbaycan Ordusu Vətən müharibəsində zəfər çalaraq erməni işğalçılarını kapitulyasiyaya məcbur etdi, düşməni qovaraq ərazi bütövlüyünə nail oldu.
Bununla da Azərbaycan yeni inkişaf dövrünə qədəm qoydu.
Bu dövrdə dünyada mürəkkəb və ziddiyyətli proseslər davam etməkdədir!
Hələ də dünyada ədalətsizliklər mövcuddur!
Hələ də dünyada ikili standartlar var!
Hələ də dünyada güclülər zəiflərin haqqını tapdalamaq istəyir!
Odur ki, biz daima güclü olmalıyıq.
Güclü olmağın əsas şərti isə bizim birliyimizdir!
Dünyanın harasında yaşamağımızdan, hansı sahədə çalışmağımızdan asılı olmayaraq, əlbir və əlaqəli fəaliyyət göstərməyi bacarmalıyıq.
Azərbaycan naminə, onun dünyada yeri, yüksək nüfuzu uğrunda daim birlikdə mübarizə aparmalıyıq.
Yalnız bu halda anamız Azərbaycanı qoruya, yüksəldə və hamımız üçün qürur mənbəyinə çevirə bilərik.
Ulu yurdumuzun adını daşıyan "Azərbaycan" qəzeti də bu amala xidmət edir.
Əziz azərbaycanlılar! Sizi Azərbaycan naminə, övladlarımızın firavan və xoşbəxt gələcəyi uğrunda əlbir və əlaqəli fəaliyyətə çağırıram!

TƏQVİM / ARXİV

Video