Özbəkistan
Prezidenti Şavkat Mirziyoyev ilə Atom Enerjisi üzrə Beynəlxalq Agentliyin
(MAQATE) baş direktoru Rafael Qrossi arasında keçirilən görüşdə ikitərəfli əməkdaşlığın
köklü şəkildə genişləndirilməsi və praktiki qarşılıqlı fəaliyyətin yeni sahələrinin
təşviqi perspektivləri müzakirə olunub.
Özbəkistan
liderinin mətbuat xidmətinin məlumatına görə, Ş.Mirziyoyev dekabrın 4-də MAQATE
nümayəndə heyətinin Özbəkistanın nazirliklərində, idarələrində və elmi müəssisələrində
keçirdiyi görüşlərin və tədbirlərin səmərəli nəticələrini yüksək qiymətləndirib.
Dekabrın
5-də Səmərqənd şəhərində aparıcı xarici sənaye mütəxəssislərinin iştirakı ilə
keçiriləcək Atom Enerjisindən İstifadəyə dair Beynəlxalq Konfransın birgə təşkili
məmnunluqla qeyd olunub.
Əməkdaşlığın
prioritet istiqamətləri kimi aşağıdakı istiqamətlər müəyyən edilib: milli
qurumların səriştəsinin və potensialının artırılması, yüksək ixtisaslı
kadrların hazırlanması, MAQATE proqramları çərçivəsində nüvə enerjisi, kənd təsərrüfatı,
sudan istifadə, səhiyyə və ekologiya sahəsində perspektivli layihələr.
Görüşün
yekunu olaraq sülhməramlı nüvə inkişafı sahəsində çoxşaxəli əməkdaşlığın genişləndirilməsi
üzrə birgə “yol xəritəsi”nin qəbulu barədə razılıq əldə olunub.
Özbəkistan
1994-cü ildən MAQATE-nin üzvüdür. Bu müddət ərzində MAQATE-nin texniki yardımı
ilə 40-dan çox birgə layihə həyata keçirilib. Hazırda qanunvericilik bazasının
və milli strukturların potensialının təkmilləşdirilməsi, nüvə elminin, tibb və
digər sahələrin inkişafı sahəsində 5 layihə həyata keçirilir.
Rizvan CƏFƏROV,
“Azərbaycan”
