Bu gün D-8 ölkələrinin enerji, iqlim dəyişikliyi və dayanıqlı şəhərsalma sahəsində əməkdaşlığı qlobal miqyasda getdikcə daha vacib əhəmiyyət kəsb edir.
AZƏRTAC xəbər verir ki, bunu Azərbaycanın ekologiya və təbii sərvətlər nazirinin müavini Umayra Tağıyeva Bakıda keçirilən ilk D-8 Yüksək Səviyyəli İqlim və Şəhərsalma Dialoqunda çıxışı zamanı deyib.
“Bu gün iqlimə davamlı gələcək naminə şəhərlərimizi və iqtisadiyyatlarımızı transformasiya etmək məqsədilə mühüm mərhələdəyik. Ötən il Azərbaycan Prezidenti İlham Əliyevin rəhbərliyi ilə ölkəmiz COP29-a ev sahibliyi etmək üçün bütün səylərini səfərbər etdi. COP29 zamanı iqlim maliyyəsi sahəsində ciddi irəliləyiş əldə olundu. Tərəflər inkişaf etməkdə olan ölkələr üçün illik maliyyəni üçqat artıraraq 2035-ci ilə qədər 300 milyard dollara çatdırmaq, həmçinin dövlət və özəl mənbələrdən illik 1,3 trilyon dolların səfərbər olunması istiqamətində razılığa gəldilər. Bu, həssas ölkələrin qorunmasına, təmiz enerjinin genişlənməsinə, yeni iş yerlərinin yaradılmasına və dayanıqlı iqtisadi artıma mühüm töhfə verəcək”, - deyə nazir müavini vurğulayıb.
Umayra Tağıyeva, həmçinin “Bakı Adaptasiya Yol Xəritəsi”nin qəbulunun əhəmiyyətini qeyd edib və bunun iqlimə davamlı infrastrukturun inkişafı üçün yeni imkanlar yaratdığını bildirib. O əlavə edib ki, Azərbaycan D-8 ölkələri ilə birgə D-8 Enerji və İqlim Mərkəzinin yaradılması təşəbbüsünü göstərib: “Bu mərkəz regional əməkdaşlığın və bilik mübadiləsinin güclənməsinə xidmət edəcək, ekspertlər, siyasətçilər və özəl sektor arasında sıx əlaqələr quracaq. Azərbaycan bu mərkəzin fəaliyyətini tam dəstəkləməyə, institusional və əməliyyat baxımından bütün lazımi yardımı göstərməyə hazırdır. D-8 ölkələri birlikdə iqlimə davamlı, yaşıl və innovativ iqtisadi modellərin qurulmasında mühüm rol oynaya bilər”.
Nazir müavini çıxışının sonunda qeyd edib ki, Azərbaycan D-8 ailəsinin üzvü kimi öz təcrübəsini paylaşmaqla yanaşı, digər ölkələrin də təcrübəsindən yararlanmağa hazırdır.
