Moskvada BMT-nin İqlim Dəyişikliyi üzrə Çərçivə Konvensiyasının Tərəflər Konfransının Bakıda keçiriləcək 29-cu sessiyasına – COP29 həsr olunmuş forum keçirilir.
AZƏRTAC xəbər verir ki, Moskva Dövlət Beynəlxalq Münasibətlər Universitetində (MDBMİ) keçirilən forumun birinci günündə iqlim dəyişikliyinin qlobal problemləri və iqlim dəyişikliyi şəraitində biomüxtəlifliyin qorunması mövzusu müzakirə olunub, iqlim mövzularına dair çoxtərəfli danışıqlar modeli hazırlanıb.
Tədbirdə çıxış edən MDBMİ-nun Beynəlxalq Ticarət və Dayanıqlı İnkişaf İnstitutunun direktoru Vladimir Salamatov bildirib ki, forumda Bakıda keçiriləcək COP29 konfransı modelləşdirilir: “Biz bu forumda iqlim dəyişikliklərinin qarşısının alınmasından danışacağıq. Bir neçə gün sonra Bakıda işə başlayacaq COP29-da müzakirə olunacaq mövzuları modelləşdirəcək, iqlim dəyişiklikləri, buna yönəlmiş layihələrin davamlı maliyyələşdirilməsi məsələləri müzakirə olunacaq”.
V.Salamatov qeyd edib ki, forumda təkcə MDBMİ-nin deyil, müxtəlif ali təhsil müəssisələrinin nümayəndələri toplaşıblar. Onlar COP29-un gündəliyində duran məsələləri müzakirə edəcək və öz mövqelərini bildirəcəklər.
Salamatov forumdakı müzakirələrin nəticələrinin COP29-un təşkilatçısı və platforması olacaq Azərbaycan tərəfinə və Rusiya Xarici İşlər Nazirliyinə təqdim olunacağını bildirib.
Rusiya Xarici İşlər Nazirliyinin xüsusi tapşırıqlar üzrə səfiri Sergey Kononuçenko isə çıxışında COP29-da əsas müzakirə mövzusunun iqlim maliyyələşdirilməsi olacağını deyib.
“Bu məsələdə yekun qərarın necə olacağı ilə bağlı hələ də fikir ayrılıqları mövcuddur. Rusiyanın mövqeyi ondan ibarətdir ki, Paris razılaşmasına uyğun olaraq, maliyyələşdirməni ənənəvi donorlar, inkişaf etmiş ölkələr həyata keçirməlidir. Paris razılaşmasının tərəfləri olan başqa heç bir dövlət bu məsələ ilə bağlı maliyyə öhdəliyi daşımır. Qərb ölkələri, təbii ki, iqlim maliyyələşdirilməsi öhdəliyi daşıyan dövlətlərin dairəsini genişləndirməyə səy göstərirlər. Onlar bu məqsədlə “istixana qazları buraxan nəhənglər” və “iqtisadiyyatı dinamik inkişaf edən ölkələr” terminlərini ortaya atıblar. Əlbəttə ki, Azərbaycan da iqtisadiyyatı dinamik inkişaf edən ölkələrə aiddir. Rusiya Azərbaycanla bu məsələdə həmfikirdir”, - deyə o vurğulayıb.
Onun sözlərinə görə, Rusiya tərəfi Paris razılaşmasına riayət edilməsində təkidlidir: “Çalışacağıq ki, Bakıdakı konfransın yekununda inkişaf etmiş ölkələrin iqlim maliyyələşməsi ilə bağlı öhdəlikləri ikili məna daşımasın, həm də iqlim dəyişikliyi üzrə mübarizənin maliyyələşməsinə ayrılan vəsaitin həcmi artırılsın. Çünki indiyə qədər ayrılan 100 milyard dollar məbləğində vəsait çox azdır”.
Rusiya XİN-in nümayəndəsi COP29-un keçirilməsində Azərbaycana uğurlar arzulayıb.
MDBMİ-nun Enerji Siyasəti və Diplomatiya Beynəlxalq İnstitutunun direktor müavini İqbal Quliyev çıxışında bildirib ki, universitetin azərbaycanlı gənclərinin təşəbbüsü ilə belə miqyaslı tədbirin keçirilməsi, COP29-un modelləşdirilməsinin təşkili çox vacib hadisədir: “MDBMİ-nun bu cür tədbirlərin keçirilməsi ilə bağlı böyük təcrübəsi var. Universitetdə indiyədək BMT, OPEC və digər beynəlxalq təşkilatların konfranslarının modelləşdirilməsi ilə bağlı tədbirlər keçirilib. Qeyd edim ki, forumun yekunları ilə bağlı tövsiyələr hazırlanacaq və Azərbaycanda keçiriləcək COP29-un katibliyinə təqdim ediləcək”.
Forumun ikinci günü iqlim dəyişikliyi ilə mübarizədə biznesin rolu mövzusu müzakirə olunacaq. Noyabrın 7-də isə tövsiyələrin və digər yekun sənədlərin təqdimatı planlaşdırılır.
